Россия Эрон-Исроил урушида нимани йўқотишдан қўрқади ёки нималарга эга бўлади?

Исроил Эронга қарши ҳарбий ҳаракатларни бошлаганида, Россия расмийлари Яқин Шарқдаги бу кескинлашувни “хавотирли” ва “хавфли” деб атади.

Шунга қарамай, Россия оммавий ахборот воситалари ушбу урушдан Москва учун эҳтимолий ижобий фойдаларни санаб ўтди. Улар қуйидагилар:

• Жаҳон бозорида нефть нархининг ошиши Россия ғазнасини “тўлдириши” кутилмоқда.
• Дунё эътибори Россиянинг Украинага қарши урушидан чалғийди. Киев унутилди.
• Агар Кремлнинг Эрон-Исроил урушида воситачилик қилиш таклифи қабул қилинса, Россия Украинадаги ҳаракатларига қарамай, ўзини Яқин Шарқдаги асосий ўйинчи ва тинчлик ўрнатувчи сифатида кўрсатиши мумкин.

Бироқ, Исроилнинг ҳарбий операциялари қанчалик узоқ давом этса, Россия ҳозирги воқеалардан кўп нарса йўқотишини тушуниб бормоқда.

“Можаронинг кучайиши Москва учун жиддий хавф ва эҳтимолий харажатларни келтириб чиқаради. Россия 5 ой олдин кенг қамровли стратегик шериклик имзолаган давлатга Исроил томонидан оммавий зарба берилишининг олдини ололмагани фактлигича қолмоқда. Аниқки, Москва Исроилни қораловчи сиёсий баёнотлардан нарига ўтишга тайёр эмас. У Эронга ҳарбий ёрдам кўрсатишга тайёр эмас”, деди россиялик сиёсатшунос Андрей Кортунов.

Россия президенти Владимир Путин ва собиқ Эрон президенти Масъуд Пезешкиён 2025 йил бошида имзолаган Россия-Эрон стратегик шериклик келишуви ҳарбий иттифоқ эмас эди. Келишув Москвани Теҳрон ҳимоясига келишга мажбур қилмайди.

Ташқи ишлар вазири Сергей Лавров “Риа Новости” ахборот агентлигига берган интервьюсида келишувда “минтақавий ва глобал миқёсда тинчлик ва хавфсизлик манфаатлари йўлида мувофиқлаштиришни кучайтиришга, Москва ва Теҳроннинг хавфсизлик ва мудофаа соҳасида яқинроқ ҳамкорлик қилишга интилишига алоҳида эътибор қаратилгани”ни таъкидлаганди.

Сўнгги 6 ой ичида Москва Яқин Шарқдаги асосий иттифоқчиси Башар Асаддан айрилган. Сурия раҳбари 2024 йилнинг декабрь ойида ҳокимиятдан ағдарилгач, унга Россиядан бошпана таклиф қилинган. Эрондаги режим ўзгариши истиқболи, яъни минтақадаги яна бир стратегик ҳамкорни йўқотиш фикри Москвани катта ташвишга солмоқда.