Америкалик актриса Сидни Суини W Magazine журналига берган интервьюсида боксчи Кристи Мартин ҳақидаги баёпикда суратга тушиш учун 13 килога семиргани ҳақида сўзлаб берди.
Актрисанинг сўзларига кўра, у бир неча ой давомида ролга астойдил тайёргарлик кўрган. Бу вақт ичида Сидни овқатланиш рационини ўзгартирди ва кўпроқ спорт билан шуғуллана бошлади. Унинг эрталабки жадвали икки соатлик спорт машғулотлари ва кикбоксинг билан шуғулланишдан иборат.
“Сидни рол ўйнаш учун кўп машқ қилди. Қанчалик оғир бўлмасин, у ҳар куни ишга югуриб келарди”, деди фильм режиссёри ва ҳаммуаллифи Девид Мишод интервьюда.
Ҳозирча номланмаган лента 1990 йилларнинг энг машҳур америкалик боксчиси Кристи Мартиннинг ҳаёти ҳақида ҳикоя қилади.
Кристининг ҳаёти 1989 йилда менежер ва бўлажак турмуш ўртоғи Жим Мартин билан учрашганида шиддат билан ўзгара бошлади. У афсонавий промоутер Дон Кинг билан шартнома имзолаган биринчи боксчи, Бокс шон-шуҳрат залига киритилган биринчи аёл, шунингдек, Sports Illustrated муқовасида пайдо бўлган ягона боксчи бўлди. Юксак мартаба ва кучли имижга қарамай, Мартин зўравонликка дуч келди. 2010 йилда турмуш ўртоғи Жим уни ўлдиришга уринган. Кейинчалик у 25 йилга қамалди.
Актриса аввалроқ Кристи Мартин роли айнан унинг учун мослигини айтганди: “Мен 12 ёшимдан 19 ёшгача грепплинг ва кикбоксинг билан шуғулланганман. Машқ қилиш ва танамни ўзгартириш учун рингга қайтишни сабрсизлик билан кутяпман. Кристининг ҳикояси оддий эмас, у катта жисмоний ва ҳиссий куч талаб қилади, бу жиддий юк бўлади. Лекин мен ўзимга қарши чиқишни яхши кўраман”.
“Кристи Мартин нафақат аёллар боксини қонунийлаштирди, балки гендер стереотипларини енгиб ўтди, шунингдек, ҳиссий, жисмоний ва молиявий зўравонликка қарши курашди. Мен кўплаб қийинчиликларга дуч келган ва уларни ўзини синдиришига йўл қўймаган аёлнинг ҳикоясини баҳам кўришим керак”, дея қўшимча қилди Суини.
Изоҳ (0)