Афсуски, жаҳонда кўкрак сути бези саратони аёлларни ўлимга олиб келувчи хавфли касаллик бўлиб қолмоқда. Ҳар йили дунё бўйича ушбу ташхис қўйилган юз минглаб аёл вафот этмоқда. Бу касаллик билан курашишнинг энг самарали йўли эрта босқичларда аниқлаш ва даволашдир. Эрта босқичида кўкрак сути бези саратони ташхиси қўйилган беморларнинг 10 тадан 9 таси ташхис қўйилганидан кейин яшаб кетади. Охирги босқичларда аниқланганда эса, 3 нафар бемордан 1 нафари тирик қолади.
Онкомаммолог-жарроҳ Умид Нажмутдинов “Дарё” нашрига кўкрак сути бези саратони юзасидан энг кўп бериладиган саволларга жавоб берди.
-xeYyq29F.avif)
Кўкрак сути безларини қачондан текшириш керак?
— 20 ёшдан бошлаб ҳар ой ўз-ўзини текшириш лозим ва йилда бир маротаба шифокор кўриги тавсия этилади.
Ўз-ўзини текшириш қандай?
— Ҳар ойнинг бир хил кунида, душ қабул қилганда ёки ётган ҳолда юмшоқ ҳаракатлар билан амалга оширилади.
Қачон маммография текширувидан ўтиб туриш керак?
— 40 ёшдан бошлаб ҳар 1–2 йилда бир марта.
Кўкрак сути бези саратонига олиб келувчи хавф омиллари.
— Ирсий омиллар, нотўғри овқатланиш, гормонал бузилишлар ва стресс.
Сут безида қаттиқлик бўлиши хавфлими?
— Ҳар қандай тугун текширув учун сабаб. Хавфли ёки хавфсизлигини фақат шифокор аниқлайди.
Бир томонлама оғриқ?
— Гормонал ўзгаришлар ёки яллиғланиш бўлиши мумкин. Лекин доимий бўлса, текшириш зарур.
Кўкрак учидан суюқлик оқиши нимадан далолат беради?
— Аксарият ҳолларда хавфсиз бўлиши мумкин. Лекин қон ёки сарғиш суюқлик хавотирли белги ҳисобланади.
Теридаги ўзгаришлар?
— Қизариш, чуқурча ёки тошмалар кўкрак сиртидаги касалликлардан белги бўлиши мумкин.
Ултратовуш текширув (УТТ) орқали нималарни билиш мумкин?
— Кистами, ўсимтами, тузилма ўзгаришими — аниқлаб беради.
Текширув оғриқлими?
— УТТ умуман оғриқсиз ўтади.
Ўсимта топилса, нима бўлади?
— Биопсия олинади. Шунга қараб даво режаси тузилади: жарроҳлик, радиация, кимё ёки гормон терапияси.
Операциясиз даволаш мумкинми?
— Баъзи ҳолатларда, ҳа. Аммо бу ташхисга боғлиқ.
Изоҳ (0)