Корея киноижодкорларининг “Қиш сонатаси” сериали орқали кўпчиликнинг севимли актрисасига айланган Чхве Жи У 1975 йил 11 июнда Жанубий Кореянинг Кенгидо вилояти Паджу шаҳрида туғилган. У 1994 йилда МBC канали ташкил этилган истеъдодлар танловида иштирок этиб, ғолиб чиқди. Шундан сўнг 1995 йилда унга “Биринчи муҳаббат” романтик сериалида рол таклиф этилди.
У 1996 йилда “Тақдир дарвозаси” фильмида биринчи бош ролини ўйнади, лекин актёрлик маҳорати етарли бўлмагани сабабли, суратга олиш жараёнининг ўртасида уни бошқа актрисага алмаштирилди.
Ижобий роллардан салбийсигача
Кейинги бир-икки йилда актриса телесериаллар ва фильмларда, жумладан “Тузоқ” драматик триллерида (1997), шунингдек “Биринчи бўса” (1998) романтик комедиясида Ан Же Ук билан ва “Романтик президент” (2002) романтик комедиясида Ан Сон Ги билан иштирок этди. Булар “Ҳақиқат” (2000) романтик драмасида ва “Ажойиб кунлар” (2001) мелодрамасида беғубор образга эга трагик қаҳрамонлар роли эди, бу унинг ортиб бораётган машҳурлигини яна ҳам оширди.
2002 йилда “Биринчи муҳаббат” сериалида иккинчи даражали рол ўйнаган актёр Пе Ён Жун билан экранларда қайта учрашди. Юн Сок Хо режиссёрлик қилган “Қиш сонатаси” сериали бутун Осиёда Корея сериаллари тўлқинининг бошлаб берди.
Натижада Чжи У Осиёда, айниқса Японияда жуда кўп мухлисларга эга бўлди ва “Малика Чжи У” деган лақабни олди.
2009 йилда Чжи У ва Ён Жун “Қиш сонатаси” анимесини дубляж қилишди. Актриса ҳали ҳам Японияда юқори ҳақ тўланадиган юлдуз ва бренд бўлиб қолмоқда, унинг сериалларини намойиш этиш ҳуқуқи ва товарларни сотишдан катта даромад келтиради.
2007 йилда Ли Чон Же билан биргаликда “Аэропорт” сериалида суратга тушиб, Инчхон аэропортининг бош директори ролини ўйнади ва бу лойиҳа билан Корея телевидениэсига қайтди.
2009 йилда Чжи У Ю Жи Тхе билан биргаликда “Менинг севгилим — юлдуз” сериалида суратга тушди, унда оддий инсонга ошиқ бўлган актриса ролини ўйнади. Чхве Чжи У ушбу сериалда ҳар бир серия учун 48 миллион вондан олган, бу ўша пайтда кореялик актрисалар учун энг юқори ҳақ эди. Шу йили, Чхве Чжи У SJW Company номли ўз агентлигини очди ва унга ўз акасини бош директор этиб тайинлади.
2011 йилда “Ҳеч қачон мағлуб бўлмайман!” романтик комедияси кичик экранларга чиқишни бошлади, унда актриса ҳамкасби актёр Юн Сан Хён билан биргаликда ўзларининг ажралиш жараёни билан юзма-юз келган икки адвокат ролини ўйнади. Бир пресс-конференцияда Чжи Удан унинг тоза ва бегуноҳ образини йўқотишдан қўрқмаётгани ҳақида сўралганда, у: “Мен 15 йил давомида бир хил образга эга эдим, мелодрама маликаси эдим, энди эса мен романтик комедия маликаси унвонини хоҳлайман”, деб жавоб берди. У “2 кун ва 1 тун” реалити-шоусида меҳмон бўлиб, ўзининг позитив ва қувноқ томонларини кўрсатганидан кейин кўпроқ мухлислар олганини қўшимча қилди.
2014 йил февралда Чхве Чжи У YG Entertainment агентлиги билан шартнома имзолагандан сўнг “Вазминлик” деб номланган романтик мелодрамада ҳамкасби Квон Сан У билан қайта учрашган, унда бой аёл ролини ўйнаган.
40 кишилик ёпиқ тўй маросими
Чхве Чжи У 2018 йил 29 мартда исми-шарифи ошкор этилмайдиган эркакка турмушга чиққан. Айтишларича, актриса кўнгил қўйган инсон ундан 6 ёш кичкина. У ахборот технологиялари соҳасида шунчаки тадбиркор эмас, балки йирик корпорация раҳбарининг жияни ҳисобланади.
Никоҳ оқшоми Жанубий Кореянинг Сеул шаҳридаги Signeal Seoul меҳмонхонасининг кичик студиясида бўлиб ўтган. Тўйда актрисанинг фақат оила аъзолари ва яқин дўстлар иштирок этган. Унинг тўй либоси Аши студияси томонидан яратилган.
Мухлислар актрисанинг тўйи ҳақида унинг фан-кафесида жойлаштирилган қўл ёзма хати орқали шахсан эълон қилганида билганлар. “Мен хижолатдаман, чунки биринчи марта хат ёзяпман. Сизлар учун бир оз кутилмаган, аммо ажойиб янгилигим бор. Мен 29 март куни биргаликда янги ҳаётни бошлашни истаган инсонимга турмушга чиқдим. Биз фақат яқин қариндошларимиз иштирокида ёпиқ тўй маросимини ўтказдик”.
Актриса 45 ёшида, 2020 йил 16 майда қизини дунёга келтирган.
Қизиқарли фактлар
- актриса Пусан аёллар коллежида рақс аэробикаси бўйича мутахассисликка эга бўлган. Кейин у Ханян театр ва кино университетига ўқишга кирган, у ерда 1 йил ўқиган, аммо ишининг кўплиги сабабли ўқишни ташлашга мажбур бўлган.
- Чжи Унинг акаси унинг агентлигининг директори. Ундан 2 ёш катта.
- “Қиш сонатаси” сериалидан сўнг япон мухлислари унга “Малика Чжи У” лақабини берган.
— Актриса Кореяда чин дилдан ҳайратланиш қобилияти учун “Қуён” лақабига эга.
- Жанубий Корея ва Японияда жуда машҳур актриса, ҳар доим Японияда суратга тушиш таклифларини оладиган Хлалюнинг 5 юлдузидан бири.
- Гўштни севади, уни кунига уч марта ейди ва ундан воз кеча олмайди.
- Спортни хушламайди. Ҳеч қандай спорт билан шуғулланмайди ва спорт кўрсатувлари ва ўйинларини томоша қилмайди. Ҳула-ҳуп ва югуриш йўлаги ёрдамида ўз қоматини сақлаб туради.
- севимли актрисаси — Гвинет Пелтроу, Чжи У уни гўзаллиги ва зиёлилиги учун ёқтиради.
Чве Жи У 2024 йил якунларига кўра, Жанубий Кореянинг энг бадавлат актрисаларидан бири ҳисобланади. Унинг айни пайтдаги молиявий аҳволи 30,5 миллион долларга баҳоланади.
Изоҳ (0)