Каскадёрлик машқлари координатори ва режиссёр Уэйд Иствуднинг сўзларига кўра, “Уддалаб бўлмас топшириқ” франшизасининг сўнгги қисмини суратга олиш пайтида Том Крузни қаттиқ чарчоқ туфайли қўлда олиб кетишга мажбур бўлишган.
Ҳодиса бипландаги ҳавода суратга олиш ишлари тугаганидан кейин содир бўлди.
“Сўнгги кунлардаги тинимсиз машғулотлар уни ҳаддан ортиқ ҳолдан тойдирди. Айниқса, бипландаги трюк вақтида кучли шамол унга урилар, қаттиқ портлаш натижасида винт ва майда темир зарралари юзига учиб келарди. Бу тасаввурингиздан ҳам хавфли ва оғир машғулотлар эди. Биз Крузни биплан қанотидан қўлда кўтариб чиқаришга мажбур бўлдик”, деди режиссёр.
2013 йилдан бери Круз билан ҳамкорлик қилиб келаётган Уэйд Иствуд унинг суратга олиш майдончасидаги машғулотларга доимо бутун куч ва ғайратини бериб иштирок этиши ва барча трюкларни мустақил бажариши ҳақида ҳам алоҳида тўхталиб ўтди:
“Том ҳеч қачон ўзидаги қўрқувни кўрсатмайди, каскадёрлик ишлари қанчалик оғир бўлмасин, унинг юзидан табассум аримайди. Актёр доим ижобий кайфиятда қолишга ҳаракат қилади ва ўз ишидан чин дилдан завқланади”, қўшимча қилди режиссёр.
Бундан ташқари, фильмда суратга тушиш учун Круз 500 мартадан ортиқ парашютдан сакраган ва 13 минг марта мотоциклда мураккаб ишларни бажарган.
“Том машинага ўхшайди. У ўзини худди 20 ёшли боладек тутади. Менимча, бунинг ҳеч қандай яширин сири йўқ, шунчаки, у тўғри овқатланиш, соғлом рацион, спорт ва интизомга амал қилади” деди Иствуд.
Аммо режиссёрнинг сўзларига кўра, бу фильмдаги энг хавфли трюк эмас. Кристофер Маккуаррининг айтишича, янги лойиҳада Том Круз янада ақл бовар қилмайдиган ишларни бажарган. “Уддалаб бўлмас топшириқ 8: якуний ҳисоб-китоб” фильмининг премераси 2025 йил 23 май куни бўлиб ўтди.
Маълумот учун: Том Круз Нью Йоркда муҳандис ва ўқитувчи оиласида туғилган. У актёрликка илк қадамларини 10 ёшида мактаб театр клубида қўйган. У “Вампир билан интервью”, “Уддалаб бўлмас топшириқ”, “Топ Ган” жанговар фильмлари, “Магнолия”, “Ванилранг осмон”, “Сўнгги самурай” драмалари ва бошқа кўплаб фильмларда унутилмас образларни гавдалантирди. Узоқ йиллик фаолияти давомида у “Оскар”га номзод ва “Олтин глобус” ғолиби сифатида бир нечта мукофотларга сазовор бўлди.
Изоҳ (0)