Ижтимоий тармоқларда 14 июнь куни ижтимоий тармоқларда “Олмазорда аёл камида 80 кундан бери асоссиз ҳибсда ўтирибди” сарлавҳаси остида хабар тарқалди. Омбудсман ҳолат юзасидан маълумот берди.
Келтирилишича, мазкур ҳолат Омбудсман назоратига олиниб, ишга оид ҳужжатлар ўрганилган. ИИВ томонидан тақдим этилган маълумотга кўра, фуқаро Н.Давранова 2024 йил 26 декабрь куни Жиноят ишлари бўйича Тошкент вилояти Оҳангарон туман суди томонидан Жиноят кодексининг 168-моддаси 4-қисми “а” банди (фирибгарлик оғир оқибатларга олиб келган ҳолатда) бўйича айбдор деб топилган ва унга нисбатан 2 йил 1 ой муддатга ахлоқ тузатиш ишлари жазоси тайинланган.
Шу билан бирга, у бошқа жиноят иши доирасида ҳам айбланувчи сифатида тергов қилинмоқда. Шунингдек, фуқаро Н.Даврановага оид бошқа жиноят ишлари ҳам тегишли судлар томонидан кўриб чиқилаётгани сабабли, у ҳозирда Ички ишлар вазирлиги ҳузуридаги Жиноят-ижроия департаменти Марказий тергов ҳибсхонасида сақланаётгани маълум қилинган.
Мазкур ҳолат юзасидан Жиноят-просессуал кодекси талабларига мувофиқ ўрганиш ўтказилиши ва ходимларнинг фаолиятига ҳуқуқий баҳо берилиши учун Н.Давранованинг мурожаати Бош прокуратурага юборилган.
Ҳибсда вафот этаётганлар иши
18 март куни бўлиб ўтган Сенат ялпи мажлисида инсон ҳуқуқлари бўйича вакил (омбудсман)нинг 2024 йилдаги фаолияти муҳокама қилинди.
Муҳокамалар жараёнида сенатор Ҳусан Эрматов президентнинг тегишли қарорига кўра, сўроқ жараёнини стенограмма қилиш, видеокузатув, шунингдек, тергов ҳаракатларини аудио ва видео қайд этиш тизимлари билан жиҳозланган хоналарни ташкил этиш бўйича ишлар қай даражада экани юзасидан ИИВ масъулларига савол берди. Саволга ИИВ ҳузуридаги Тергов департаменти бошқарма бошлиғи Шерзод Шерматов жавоб берди. Унинг айтишича, бугунги кунда департамент ва унинг ҳудудий бўлимларида тергов ҳаракатларини аудио ва видео қайд этиш тизимлари билан жиҳозланган 57 та махсус хоналар ташкил этилган.
Февраль ойида Сурхондарёда сўроққа олиб кетилган фермер вафот этган, ИИВ Жазони ижро этиш департаментининг Олмалиқдаги 14-сонли колониясидан 21 яшар маҳкум — Муҳаммадқодир Пўлатовнинг жасади чиққан эди.
Маълумот учун, қийноқ оқибатида келиб чиққан ўлим ҳолатлари учун жавобгарлик кучайтирилмоқда. Унга кўра, Жиноят кодексига киритилаётган ўзгартириш ва қўшимчаларга мувофиқ 235-модда 3 ва 4-қисм билан тўлдириляпти:
- ушбу модданинг биринчи ёки иккинчи қисмида назарда тутилган ҳаракатлар баданга оғир шикаст етказилишига сабаб бўлса, муайян ҳуқуқдан маҳрум этиб, 8 йилгача озодликдан маҳрум қилиш билан жазоланади;
- ушбу модданинг биринчи ёки иккинчи қисмида назарда тутилган ҳаракатлар жабрланувчининг ўлимига ёки бошқа оғир оқибатларга сабаб бўлса, муайян ҳуқуқдан маҳрум этиб, 8 йилдан 10 йилгача озодликдан маҳрум қилиш билан жазоланади.
Изоҳ (0)