Актёрлар қанча маҳоратли бўлмасин, тўсатдан юз берган автотранспорт ҳодисаси туфайли ҳаёти хавф остида қолиши табиий. Афсуски, улар ҳам фильмлардаги қаҳрамонлари каби вақтдан ўзиб кетолмайди. Қуйида жиддий автоҳалокатга учраган таниқли кино олами вакилларига эътибор қаратдик.
Кевин Ҳарт
“Жуманжи”, “Жосус Дўстлар”, “1+1:Голливуд ҳикояси” каби фильмлар билан танилган машҳур комик актёр Кевин Ҳарт 2019 йилда автоҳалокатга учрайди. Машина бошқарувида унинг ҳайдовчиси Жаред Блек бўлган. Машина йўлдан чиқиб кетиши натижасида ёғоч панжарага бориб урилган. Машина аянчли ҳолатга келиб қолган, лекин ҳеч кимга зарар етмаган. Кевин ҳатто яқин атрофдаги уйлардан бирига пиёда борган. Шунга қарамай у операцияга муҳтож эди, чунки белидан жиддий жароҳат олган.
Меттью Бродерик
Женнифер Грэй 1980 йилларнинг охирида Меттью Бродерик билан ишқий муносабатда бўлган. Афтидан уларнинг севгиси жуда тез тугаганга ўхшайди, чунки уларни 1987 йилда содир бўлган бахтсиз ҳодисадан кейин деярли бирга кўришмаган. Меттью Бродерик ўзининг Volvo русумли машинасини ҳайдаб кетаётиб, тўсатдан салонида она ва унинг қизи бўлган машина билан тўқнашиб кетади. Грэй ва Бродерик енгилроқ жароҳат олади, аммо иккинчи машинадагилар билан бундай деб бўлмайди. Кейинчалик Меттью одам ўлимига олиб келиши мумкин бўлган хавфли ҳайдашда айбланди, аммо 175 доллар жарима билан қутулиб қолди.
Майкл Б. Жордан
Майкл Б. Жордан ўзининг кўк рангли Ferrari’сини Голливуд бўйлаб ҳайдаб кетаётиб, тўсатдан бошқарувни йўқотади ва тўхтаб турган машинага бориб урилади. Майкл жиддий жароҳат олмаган, аммо таъмирга муҳтож бўлган машина ҳақида бундай деб бўлмайди. Бироқ у бу ҳодисадан кейин соғлиги ҳақида ташвишланганга ўхшайди, сабаби бу воқеадан кейин машинада бориши керак бўлган хайрия тадбирини ўтказиб юборган.
Жеймс Дин
Жеймс Дин пойга ўйинларига ўзгача иштиёқи бўлган Голливуднинг машҳур актёрларидан бири эди. Жеймсда энг яхши спорт автомобиллари бўлиб, тез-тез пойгаларда қатнашиб турган. Ҳатто у “Индианаполис 500 Милес” мусобақасида ҳам иштирок этишни режалаштирган, бироқ улгурмаган. 1955 йил 30 сентябрь куни унинг машинаси 23 ёшли талабанинг машинаси билан тўқнашиб кетиши натижасида автоҳалокат қурбони бўлди. Айбнинг катта қисми талабада бўлишига қарамай, унга қўйилган барча айбловлар олиб ташланган. Жеймс Диннинг машинаси шундан сўнг, бир неча қўлдан ўтгани ва яна бир нечта бахтсиз ҳодисаларга дуч келгани айтилади.
Морган Фриман
“Шоушенкдан қочиш”, “Бахт ортидан қувиб” ва бошқа кўплаб фильмлар билан танилган актёр 2008 йил 71 ёшида ўзининг Nissan Maxima машинасини ариққа ҳайдаган ва қутқарувчилар уни олиб чиққунча мажақланган машинада бир неча соатни ўтказишга мажбур бўлган. Тахминларга кўра, Морган рулда ухлаб қолиши натижасида автоҳалокатга учраган. Бахтсиз ҳодиса кайфиятига унчалик ҳам ёмон таъсир қилмаган, у қутқарувчиларга бир нечта ҳазиллар айтиб берган ва жарроҳлик столига ётгунча ухламаган.
Ҳэлли Берри
2000 йилда актриса ижарага олинган машинани қизил чироқда ҳайдаб, бошқа бир машинага бориб урган. Жабрланувчига ёрдам бериш ўрнига жуфтакни ростлаб қолган. Бошқа машинада бўлган жабрланувчи актрисани тез ёрдам бўлимида кўрганидан кейингина бу Ҳэлли Берри эканлигини билган. Натижада Берри бир йиллик синов муддати, 13,5 доллар жарима ва 200 соатлик жамоат ишларида қатнашиш мажбуриятини олган. Унинг автоҳалокат содир бўлган жойдан яширинганлиги ва жабрланувчининг аҳволи оғир бўлганлиги сабаб ҳукм кўпчиликка ёқмади. Жабрланган шахс ёнаётган машинада қамалган ва ўт ўчирувчиларни кутишга мажбур бўлган.
Пол Уокер
Пол Уокер дўсти билан хайрия тадбиридан қайтаётганда уларнинг машинаси чироқ устунига бориб урилган. Ҳеч ким уларни машинадан олиб чиқишга улгурмаган, натижада машина ёниб кетган. Ўша пайтда Пол “Форсаж” фильмининг еттинчи қисмида суратга тушаётган эди ва фильм ижодкорлари содир бўлган воқеадан хабар топгач, вазиятдан чиқиш йўлини излай бошлаган. Турли таклифлар бўлган, лекин охир-оқибат ҳурмат юзасидан унинг ролини фильмда чиқаришга қарор қилинган.
Гэри Бьюзи
Гэри Бьюзи ноодатий қиёфага эга, лекин актёр аввал бошқача кўринишда бўлган. Бу қиёфа мотоциклни шлемсиз ва хавфли ҳаракатларни амалга ошириш истаги билан ҳайдаш натижасидир. 1988 йилда Гэри янги Harley Devidson мотоциклини олган пайтида автобусни айланиб ўтмоқчи бўлган. Натижада ағдарилиб тушган ва тўғри йўл четига қараб учган. Кейинчалик жиддий операция ва узоқ тикланишни бошдан кечиришга мажбур бўлган.
Изоҳ (0)