HBO (Home box office) компанияси “Гарри Поттер” асарига асосланган янги сериалда Драко Малфой ва унинг отаси Люциус ролларини ижро этадиган актёрларни танлади.
Расмий пресс-релизда келтирилишича, Драко ролини ёш актёр Локс Пратт гавдалантиради, Люциус Малфойни эса британиялик актёр ва мусиқачи Жонни Флинн ўйнайди. Флинн илгари “Эмма” (2020) комедик драмаси ҳамда Энтони Ҳопкинс иштирокидаги “Ягона ҳаёт” фильмидаги роллари билан танилган.
Шунингдек, Хогвартсдаги баъзи ўқувчиларни кимлар ижро этиши ҳам маълум бўлди. Шеймас Финниган ролида — Лео Эрли, Парвати Патил ролида — Алессия Леони, Лаванда Браун образида эса Сиэнна Муса намоён бўлади.
Variety нашри хабарига кўра, сериалдаги Дурслей оиласи аъзолари Вернон ва Петуния ролларини Бел Паули ва Дениел Ригби ижро этади. Бироқ уларнинг ўғли Дадли образини ким ўйнаши ҳозирча номаълум.
Аввалроқ HBO асосий учлик — Гарри, Гермиона ва Рон ролларини ижро этадиган актёрлар исмини ошкор этганди. Гарри Поттер ролини 11 ёшли Доминик МакЛоклин, Гермиона Грэйнжер ролини 11 ёшли Арабелла Стентон, Рон Уизли образини эса 12 ёшли Аластер Стаут гавдалантиради.
Ёш сеҳргарнинг саргузаштлари ҳақидаги фильмнинг асосий ролларига номзодларни қидириш учун муаллифлар очиқ кастинг ўтказган, унда 30 мингдан ортиқ номзод иштирок этган.
Сериал суратга олиниши ҳақида илк бор 2023 йил апрель ойида Warner Bros. ва HBO томонидан эълон қилинган. Мазкур телевизион лойиҳа Ж.К. Роулинг қаламига мансуб машҳур “Гарри Поттер” романлар сериясига асосланган бўлиб, ҳар бир мавсумда китобларнинг бир қисми ёритилиши режалаштирилган. Биринчи фасл 2027 йилда намойиш этилиши кутилмоқда. Умуман олганда, сериал етти фаслдан иборат бўлади.
Изоҳ (0)