Жанубий Кореяда келгуси беш йил давомида мамлакатни бошқарадиган 20-президентни сайлаш жараёни бўлиб ўтмоқда. Конституцияга мувофиқ амалдаги президент Мун Чже Ин қайта сайланиш ҳуқуқидан маҳрум бўлган. Унинг ўрнини эгаллаш учун либерал Қўшма демократик партия аъзоси Ли Чже Мён ва консерватив асосий мухолифатдаги Халқ ҳокимияти партияси номзоди Юн Сок Ел курашмоқда.
Reuters агентлигининг таъкидлашича, янги президент Жанубий Кореяда COVID-19 пандемиясининг энг оғир тўлқини оқибатларини енгиш, тенгсизликнинг чуқурлашиши ва уй-жой нархларининг кўтарилиши, шунингдек, Хитой ва АҚШ ўртасидаги тобора кучайиб бораётган рақобатни енгиб ўтиш каби муаммоларга дуч келади.
Сайлов участкалари ёпилгач, дарҳол овозларни санаш бошланади. Сайловлар Жанубий Кореяда COVID-19 билан касалланишнинг кучли ўсиши фонида ўтказилмоқда. Аввалроқ ҳукумат карантиндаги юз минглаб фуқароларнинг сайлов участкаларига келишига рухсат берганди.
Сайлов органлари маълумотларига кўра, бутун мамлакат бўйлаб сайлаш ҳуқуқига эга 44 миллион фуқароларнинг 61 фоиздан ортиғи маҳаллий вақт билан соат 13:00 гача номзодларга ўз овозини берган. Бу рақам сайловчиларнинг рекорд даражадаги иштирокини англатади. Мамлакатда муддатидан олдин овоз бериш 4 мартда бошланган.
Мавзуга доир: Жанубий Кореяда президентлик сайловлари олдидан ҳукмрон партия етакчисига ҳужум қилинди (видео)
Миллий сайлов комиссияси маълумотларига кўра, 9 март куни жанубий кореяликлар учун 14 464 та сайлов участкаси хизмат қилмоқда.
Сайлов натижалари Жанубий Кореянинг кейинги ривожланишига сезиларли таъсир кўрсатиши мумкин, чунки номзодларнинг нуқтаи назари ҳам ички сиёсат, жумладан, ижтимоий таъминот, ҳам ташқи сиёсат, жумладан, Шимолий Корея билан алоқалар муаммоси бўйича фарқланади.
Эслатиб ўтамиз, 2021 йилнинг декабрь ойида Жанубий Корея ҳукумати мамлакатнинг биринчи аёл президенти, коррупция ва мансаб ваколатини суиистеъмол қилишда айбланган Пак Кин Хени афв этганди. Пакга қарши 2017 йилнинг март ойида импичмент эълон қилинган. Мамлакат раҳбари сифатида содир этган кўплаб жиноятлари ва қонунбузарликлари учун у муддатидан аввал давлат раҳбари лавозимидан четлатилган ва 2018 йилнинг апрелида 22 йиллик қамоқ жазосига ҳукм қилинганди.
Маълумот учун Жанубий Кореянинг Ўзбекистон билан савдо айланмаси Мун Чже Ин даврида 2016 йилдаги 1 миллиард доллардан 2021 йил якунлари бўйича 1,8 миллиард долларгача ўсди.
Изоҳ (0)