Жанубий Корея полицияси ҳарбий ҳолат жорий этилиши бўйича олиб борилаётган тергов доирасида ҳарбий разведка қўмондонлигининг амалдаги ва собиқ раҳбарларини ҳибсга олди. Бу ҳақда Yonhap агентлиги хабар берди.
Полициянинг махсус тергов гуруҳи ҳозирги қўмондон генерал майор Мун Сан Ҳо ва қўмондонликнинг собиқ раҳбари Ноҳ Сан Вонни ҳибсга олганини маълум қилди, дейилади хабарда.
Мун президент Юн Сок Ёл кутилмаганда ҳарбий ҳолат эълон қилганидан сўнг Квачхондаги Миллий сайлов комиссияси идорасига қўшин юборганликда гумонланмоқда. Армия воқеа жойига икки дақиқада етиб келгани сабабли, ҳуқуқни муҳофаза қилиш органлари ходимлари Муннинг президент ҳарбий ҳолат эълон қилиш ниятидан хабардор бўлгани ёки уни жорий этишда иштирок этгани ҳақида тахмин қилмоқда.
Ҳозирги ҳарбий разведка бошлиғи собиқ мудофаа вазири Ким Ёнг Ҳьюннинг яқин ҳамкори ҳисобланади. Тергов маълумотларига кўра, у Юнни ҳарбий ҳолатни жорий этишга тайёрлаганликда гумонланмоқда. Полиция иккала раҳбарни сўроқ қилиш учун 48 соатгача ушлаб туриши мумкин. Агар суд бу вақт ичида расмий қамоқ ордерини бермаса, Мун ва Ноҳни озод қилиш шарт бўлади.
Кореяда ҳарбий ҳолат
Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. Парламент ва сиёсий партияларнинг фаолияти тақиқланди. Давлат раҳбари бу қарорни “конституциявий тартибни ҳимоя қилиш ва мамлакат ичидаги Шимолий Корея тарафдорларини йўқ қилиш” зарурати билан изоҳлади.
Ҳукумат ҳаракатларидан норози бўлиб, парламент биноси олдида намойишчилар тўпланди. Полиция парламентга киришни тўсиб қўйди ва шаҳар кўчаларида ҳарбий техника пайдо бўлди.
Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади. Кечроқ Жанубий Корея президенти мамлакатда жорий этилган ҳарбий ҳолатни бекор қилишга рози бўлди.
Ким Ён Ҳьюн 3 декабрь куни ҳарбий ҳолат жорий этилиши билан боғлиқ қонунбузарликлар бўйича тергов ишининг биринчи гумондори бўлди.
Изоҳ (0)