Жанубий Корея кинематографиясининг кўришга арзигулик янгиликлари ҳақида маълумот берамиз.
“Раҳм-шафқат бўлмайди”
Гу Бон Сан ва Ли Жу Вон бир-бирига душман бўлган тўда бошлиқлари. Узоқ йиллар давомида Нам Ги Жун Бон Саннинг ишончли одами бўлиб келган, бироқ ягона укаси Нам Ги Сок Жу Воннинг ёрдамчисига айланганини билгач, у бутунлай ишдан четлашишга қарор қилган. 11 йил мобайнида Ги Жун камтарона ҳаёт кечириб, ҳалол фуқарога айланади. Аммо у ўз кўникмаларини йўқотмаганди. Кутилмаганда у Ги Сокнинг ваҳшийларча ўлдирилганини эшитиб қолади. Шундан сўнг Нам Ги Жун жиноят оламига қайтади, бироқ унинг ягона мақсади — қотилни топиш ва уни шафқатсизларча жазолаш.
“Бизнинг фильм”
Ли Же Ха кўп йиллар олдин отасининг изидан бориб, буюк режиссёр бўлишга аҳд қилганди ва у бунга эришади. Же Ханинг дебют фильми уни жаҳонга машҳур қилади. Бироқ эришган муваффақияти унга кутилмаган таъсир кўрсатади — у бошқа шундай муваффақиятли фильм суратга ололмаслигидан хавотирланиб, бир неча йилга кинодан кетади. Беш йил ўтгач, у кино оламига қайтишга қарор қилади ва умри саноқли қолган инсон ҳақида фильм суратга олмоқчи бўлади. Айнан шу пайтда Же Ха Ли Да Им билан танишади — у ёш, жуда истеъдодли ва тузалмас хасталикка чалинган актриса бўлиб, умри жуда оз қолганди. Улар биргаликда янги фильм устида ишлашни бошлайди.
“Скалпелли овчи”
Се Хён Жанубий Кореянинг энг моҳир суд-тиббиёт эксперти бўлиб, узоқ йиллардан бери оилавий сирларини атрофдагилардан пухта яшириб келади. Кунларнинг бирида унга ёрдам сўраб терговчи Чо Чон Хён мурожаат қилади. У руҳий касал бўлган қотил томонидан содир этилган бир қатор қотилликларни тергов қилмоқда. Терговчининг илтимосига кўра, Се Хён навбатдаги мурдани ёриб кўраётганда, бу қотилликларга айнан унинг отаси алоқадор эканлигини аниқ кўрсатадиган далилларни топиб олади.
“Сайловдаги шерик”
Се Хун энг аълочи ўқувчилардан бири. Бир куни у мактаб автобусидаги ҳодиса марказида қолиб, атрофдагилар уни чинакам омадсиз деб ҳисоблашади. Вазиятни ўнгламоқчи бўлган Се Хун директорнинг таклифини қабул қилади ва таълим муассасаси президентлигига 12-номзодга айланади. Мусобақа бошида у мағлуб бўлишига ишонган бўлса-да, якуний сайловлар яқинлашган сари Се Хун ғолиб бўлишга тобора қатъият билан киришади.
“Кён У ва пари”
Пак Сон А бир қарашда оддий юқори синф ўқувчисига ўхшайди. Бироқ беш йилдан бери у тунлари шомон сифатида ишлайди ва одамларга муаммоларини ҳал қилишда кўмаклашади. Кунлардан бир куни Пе Кён У ва онаси унинг қабулига келишади. Сон А йигитни кўриши билан севиб қолади, лекин унинг яқинда вафот этишини билади. Эртаси куниёқ Кён У янги ўқувчи сифатида унинг мактабига ўтказилади, шунда шомон қиз уни муқаррар ўлимдан қутқаришга аҳд қилади. Шундай қилиб, Кён У ва пари ўртасида дўстлик бошланади.
“Калмар ўйини-3”
Энг машҳур корейс драмаларидан бирининг якунловчи қисми 27 июнь куни яна экранларга қайтади. Ги Хун қонли ўйинда шунчаки ғалаба қозониш билан чекланмай, балки унинг яратувчиларини тўхтата оладими ёки содир бўлаётган воқеаларнинг асл моҳиятини англагач, навбатдаги бошловчига айланадими?
Изоҳ (0)