Жанубий Кореяда лавозимидан четлатилган собиқ президент Юн Сок Ёлнинг вориси аниқланадиган янги президентлик сайлови 3 июнь куни ўтказилади. Бу ҳақда ҳукуматдаги манбаларга таяниб Yonhap хабар берди.
Ушбу сана бош вазир вазифасини бажарувчи Хан Док Су бошчилигидаги Вазирлар Маҳкамаси йиғилишида тасдиқланиши кутилмоқда. Конституциявий суднинг импичмент тўғрисидаги қароридан сўнг мамлакат 60 кундан кечиктирмай муддатидан олдин президентлик сайловини ўтказиши керак.
Агар сана тасдиқланса, сайлов тақвимига кўра, номзодлар 11 майдан кечиктирмай ариза топширишлари лозим, сайлов кампанияси эса 12 майдан бошланади. Янги президент 3 июнь куни бўлиб ўтадиган сайловлардан сўнг ўз лавозимига киришади.
Кореядаги ҳарбий ҳолат ва Юнга қарши импичмент
2024 йилнинг декабрида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди. Шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган. Унинг ўзи исёнга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Аммо Юнни лавозимидан бутунлай четлатиш учун Конституциявий суднинг қарори керак эди. Бу вақт давомида Юн Сок Ёл расман Жанубий Корея президенти бўлиб қолган. Ҳарбий ҳолат эълон қилишга муваффақиятсиз уринганидан 4 ой ўтиб, Юн лавозимидан бутунлай четлаштирилган. Президент ўз қарори билан конституция, қонун устуворлиги ва демократия тамойилларини бузгани таъкидланган.
У исёнга уриниш айбловларини рад этган ва “сиёсий жиҳатдан текширилган қарори” давлатни мухолифатдан ҳимоя қилиш учун қабул қилинганини айтган. Унинг адвокатлари Конституциявий суддаги жараён “ноқонуний ва адолатсиз” бўлганини билдирган. Март ойида суд президент Юн Сок Ёлни ҳибсдан озод қилиб, унга қарши ҳибсга олиш ордерини бекор қилган эди.
Изоҳ (0)