Janubiy Koreyada lavozimidan chetlatilgan sobiq prezident Yun Sok Yolning vorisi aniqlanadigan yangi prezidentlik saylovi 3-iyun kuni o‘tkaziladi. Bu haqda hukumatdagi manbalarga tayanib Yonhap xabar berdi.
Ushbu sana bosh vazir vazifasini bajaruvchi Xan Dok Su boshchiligidagi Vazirlar Mahkamasi yig‘ilishida tasdiqlanishi kutilmoqda. Konstitutsiyaviy sudning impichment to‘g‘risidagi qaroridan so‘ng mamlakat 60 kundan kechiktirmay muddatidan oldin prezidentlik saylovini o‘tkazishi kerak.
Agar sana tasdiqlansa, saylov taqvimiga ko‘ra, nomzodlar 11-maydan kechiktirmay ariza topshirishlari lozim, saylov kampaniyasi esa 12-maydan boshlanadi. Yangi prezident 3-iyun kuni bo‘lib o‘tadigan saylovlardan so‘ng o‘z lavozimiga kirishadi.
Koreyadagi harbiy holat va Yunga qarshi impichment
2024-yilning dekabrida Janubiy Koreya prezidenti mamlakatda harbiy holat joriy etishga muvaffaqiyatsiz urinib ko‘rdi. Shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan. Uning o‘zi isyonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Ammo Yunni lavozimidan butunlay chetlatish uchun Konstitutsiyaviy sudning qarori kerak edi. Bu vaqt davomida Yun Sok Yol rasman Janubiy Koreya prezidenti bo‘lib qolgan. Harbiy holat e’lon qilishga muvaffaqiyatsiz uringanidan 4 oy o‘tib, Yun lavozimidan butunlay chetlashtirilgan. Prezident o‘z qarori bilan konstitutsiya, qonun ustuvorligi va demokratiya tamoyillarini buzgani ta’kidlangan.
U isyonga urinish ayblovlarini rad etgan va “siyosiy jihatdan tekshirilgan qarori” davlatni muxolifatdan himoya qilish uchun qabul qilinganini aytgan. Uning advokatlari Konstitutsiyaviy suddagi jarayon “noqonuniy va adolatsiz” bo‘lganini bildirgan. Mart oyida sud prezident Yun Sok Yolni hibsdan ozod qilib, unga qarshi hibsga olish orderini bekor qilgan edi.
Izoh (0)