Janubiy Koreya Demokratik partiyasining prezidentlikka nomzodi Li Chje Myon KXDR bilan aloqa kanallarini qayta tiklash va Koreya iqtisodiyotini jonlantirish maqsadida Koreyalararo hamkorlikni rivojlantirishni va’da qilmoqda, Bu haqda u o‘zining Facebook sahifasida ma’lum qildi.
“Iqtisodiyotni jonlantirish va fuqarolar hayotida barqarorlikni ta’minlash uchun “Koreya yarimorolidagi xatarlar”ni bartaraf etish zarur. Biz Koreyalararo aloqa kanallarini, jumladan, harbiy ishonch liniyasini tiklash va keskinlikni keltirib chiqaradigan harakatlardan o‘zaro voz kechishga erishish orqali vaziyatni nazorat qilib boramiz”, dedi prezidentlikka nomzod.
2023-yil aprel oyidan boshlab Shimoliy Koreya Koreyalararo harbiy aloqa liniyasi orqali rejalashtirilgan qo‘ng‘iroqlarga javob berishni to‘xtatgan edi.
2023-yilda Shimoliy Koreya razvedka sun’iy yo‘ldoshini uchirganidan so‘ng, Seul 2018-yildagi harbiy keskinlikni yumshatish to‘g‘risidagi shartnomaga qisman rioya qilmaslikka qaror qildi. Bunga javoban Pxenyan bu kelishuvlarga endi to‘liq amal qilmasliklarini e’lon qildi. Janubiy Koreya esa 2024-yilning yozida qolgan qoidalarga rioya qilishni to‘xtatdi.
“Janub va Shimol o‘rtasidagi muloqot, almashinuvlar va xalqqa ma’qul bo‘lgan hamkorlikni rivojlantirishga erishamiz”, dedi siyosatchi.
Shimoliy Koreya rahbari Kim Chen In esa yaqinda Janubiy Koreyaning asosiy dushman maqomini konstitutsiyaviy mustahkamlashni taklif qilgan va “Xalq respublikasini yutib yuborishga intilayotgan Janubiy Koreya” bilan birlashishning iloji yo‘qligini ta’kidlagandi.
“Shimoliy Koreyaning yadrosizlanish jarayoni to‘xtatilganiga ancha vaqt bo‘ldi. Ularning yadroviy va raketa salohiyati kun sayin ortib bormoqda. Koreya yarimorolida tinchlikni ta’minlash va Shimoliy Koreya yadroviy muammosini hal qilishda amaliy taraqqiyotga erishish uchun biz AQSH bilan yaqindan hamkorlik qilamiz va xalqaro hamjamiyat bilan ko‘p tomonlama hamkorlikka intilamiz”, deydi Li Chje Myon.
Shu bilan birga, agar saylansa, Pxenyanning “assimetrik tahdidlariga javob berish uchun tayyorgarlikni” kuchaytirishini ta’kidlagan.
Izoh (0)