Janubiy Koreya prezidenti Yun Sek Yol televideniye orqali xalqqa murojaatida mamlakatda harbiy holat joriy etilganini ma’lum qildi, deb xabar bermoqda Yonhap agentligi.
“Shimoliy Koreya tarafdori kuchlarni yo‘q qilish va erkin konstitutsiyaviy tuzumni himoya qilish uchun harbiy holat eʼlon qilaman”, dedi prezident.
Mahalliy OAVga ko‘ra, Yun Sek Yol, shuningdek, Milliy assambleya (Janubiy Koreyaning bir palatali parlamenti) iyun oyida yangi hukumat inauguratsiyasidan so‘ng 22 nafar hukumat amaldoriga impichment e’lon qilishga uringanini aytgan.
Bu, davlat rahbarining so‘zlariga ko‘ra, “nafaqat misli ko‘rilmagan”, balki davlatning sud va ijro hokimiyatini falaj qiladi. U, shuningdek, Demokratik partiyani (parlamentda ko‘pchilikni tashkil etadi) kelgusi yil byudjetini rekord darajadagi 4,1 trillion vonga (taxminan 3 milliard dollar) qisqartirish niyatini tanqid qilgan.
“Milliy Assambleyamiz jinoiy guruhlar uyasiga aylandi. Liberal demokratiyaning asosi bo‘lishi kerak bo‘lgan Milliy Assambleya liberal demokratik tizimni yo‘q qiladigan yirtqich hayvonga aylandi”, dedi u.
Prezident harbiy holatning joriy etilishini “odamlar erkinligi va xavfsizligini, shuningdek, mamlakatning davlatga qarshi kuchlar harakatlariga qarshi turishini ta’minlashning muqarrar chorasi” deb atagan. Uning taʼkidlashicha, harbiy holat fuqarolarga biroz noqulaylik tug‘dirishi mumkin, biroq rasmiylar bunday noqulayliklarni minimallashtirishga eʼtibor qaratadi.
“Tashqi siyosatda o‘zgarish yo‘q, Koreya Respublikasi o‘z masʼuliyatini va xalqaro hamjamiyat oldidagi hissasini bajarmoqda”, deya qo‘shimcha qilgan Yun Sek Yol.
Shu bilan birga, Respublika Mudofaa vazirligi barcha qurolli kuchlar asosiy qo‘mondonlarining yig‘ilishi bo‘lib o‘tgani va qurolli kuchlarning favqulodda vaziyatlarga tayyorgarligi hamda shayligini kuchaytirish bo‘yicha ko‘rsatmalar berilganini ma’lum qildi.
Yun Sek Yol harbiy holat e’lon qilganidan so‘ng Demokratik partiya barcha a’zolarini zudlik bilan Milliy Assambleyaga yig‘ilishga chaqirdi. Uning rahbari Li Chje Myon prezidentning harakatlarini konstitutsiyaga zid va noqonuniy deb atadi.
“Xalq kuchi” yetakchisi Xan Don Xun ham prezidentning harbiy holat e’lon qilish haqidagi qarorini noto‘g‘ri deb atagan va prezidentning harakatlarini xalq bilan birgalikda to‘xtatishga va’da berdi.
Izoh (0)