Birlashgan demokratik partiyadan nomzod Li Chje Myon Janubiy Koreyadagi navbatdan tashqari prezidentlik saylovlarida g‘alaba qozondi. Bu haqda Yonhap axborot agentligi xabar bermoqda.
Ta’kidlanishicha, Lining g‘alabasi 2022-yilgi avvalgi saylovlarda sobiq prezident Yun Sok Yoldan atigi 1 foizlik farq bilan mag‘lubiyatga uchraganidan so‘ng e’tiborga loyiq qaytish bo‘ldi.
Ma’lumotlarga ko‘ra, 98,56 foiz saylov byulletenlari qayta ishlangandan so‘ng, muxolifat nomzodi Li Chje Myon 49,25 foiz ovozni qo‘lga kiritgan. Uning raqibi, hukmron konservativ “Fuqarolik kuchi” partiyasidan nomzod Kim Mun Suga esa fuqarolarning 41,40 foizi ovoz bergan.
Saylovlar 3-iyun kuni o‘tkazildi. Prezidentlik uchun asosiy nomzodlar Li Chje Myon va uning bosh raqibi, hukmron konservativ “Fuqarolik kuchi” partiyasidan Kim Mun Su edi. Saylovlar yakunlanishiga bir soat qolganida saylovchilar faolligi 28 yil davomidagi rekord daraja — 77,8 foizni tashkil etdi.
Li Chje Myon saylovoldi dasturida Shimoliy Koreya bilan aloqa kanallarini qayta tiklash va Koreya iqtisodiyotini jonlantirish maqsadida Koreyalararo hamkorlikni rivojlantirishni va’da qilgandi. Shu bilan birga, agar saylansa, Pxenyanning “assimetrik tahdidlariga javob berish uchun tayyorgarlikni” kuchaytirishini ta’kidlagandi.
Yangi prezidentning tarjimayi holi
Janubiy Koreyaning bo‘lajak prezidenti 1964-yil 22-dekabrda (rasmiy ro‘yxatga ko‘ra, aslida 1963-yil 23-oktyabrda) Andon shahrida kambag‘al, ko‘p bolali oilada tug‘ilgan. 1986-yilda Seuldagi Chung-Ang universitetining huquqshunoslik kollejini tamomlagan. 1989-yilda yuridik amaliyotni boshlagan, 2005-yilda esa siyosat bilan shug‘ullana boshlagan.
2006-yilda Sonnam shahar hokimi lavozimiga nomzodligini qo‘ygan, ammo muvaffaqiyatsizlikka uchragan. 2010-yildan 2018-yilgacha ikki muddat davomida Sonnam shahar hokimi lavozimida ishlagan.
U prezidentlikka ilk bor nomzodini qo‘ymayapti. Tarjimayi holiga ko‘ra, Li 2017 va 2022-yillarda ham nomzod bo‘lgan.
Koreyadagi harbiy holat va Yunga qarshi impichment
2024-yilning dekabrida Janubiy Koreya prezidenti Yun Sok Yol mamlakatda harbiy holat joriy etishga muvaffaqiyatsiz urinib ko‘rdi. Shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan. Uning o‘zi isyonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Ammo Yunni lavozimidan butunlay chetlatish uchun Konstitutsiyaviy sudning qarori kerak edi. Bu vaqt davomida Yun Sok Yol rasman Janubiy Koreya prezidenti bo‘lib qolgan. Harbiy holat e’lon qilishga muvaffaqiyatsiz uringanidan 4 oy o‘tib, Yun lavozimidan butunlay chetlashtirilgan. Prezident o‘z qarori bilan konstitutsiya, qonun ustuvorligi va demokratiya tamoyillarini buzgani ta’kidlangan.
U isyonga urinish ayblovlarini rad etgan va “siyosiy jihatdan tekshirilgan qarori” davlatni muxolifatdan himoya qilish uchun qabul qilinganini aytgan. Uning advokatlari Konstitutsiyaviy suddagi jarayon “noqonuniy va adolatsiz” bo‘lganini bildirgan. Mart oyida sud prezident Yun Sok Yolni hibsdan ozod qilib, unga qarshi hibsga olish orderini bekor qilgan edi.
Izoh (0)