Италиянинг Пиедмонт округида бир йилга яқин вақт давомида бедарак йўқолган 64 ёшли шифокор Никола Ивалдонинг жасади сунъий интеллект ёрдамида топилди. Бу ҳақда NDTV хабар берди.

Маълум қилинишича, Италия Миллий Алп ва ғор қутқарув хизмати 1 йил давомида Никола Ивалдони қидирув ишларини олиб борган. Аммо анъанавий қидирув усуллари натижа бермагач, жараёнга замонавий дронлар жалб қилинган. 2 та дрон 29 июль куни 5 соат мобайнида Пиедмонт округидаги ўрмон ҳудудларини кузатган. Сўнгра қутқарувчилар бу тасвирларни СИга юклаган ва натижада дарҳол “шубҳали нуқталар” аниқланган.
CНСАС дрони учувчиси Саверио Исоланинг айтишича, СИ тасвирларда ўзгача рангдаги пикселни аниқлаб, тоғ ҳайбати олдида жуда кичик бўлиб кўринадиган марҳумнинг дубулғасини топишга муваффақ бўлган. Ёмғир ва туман сабаб қутқарув ишлари кечиккан бўлса-да, 31 июль куни жасад мутахасислар ва дронлар ёрдамида топилган. Қутқарувчилар фикрича, суратларни уларнинг ўзлари таҳлил қилганида бу жараён ҳафталар ёки ойларга чўзилиши мумкин эди. Исола бу ҳақда шундай фикр билдирган:
“Бу инсон ютуғи, аммо технологиясиз бу муваффақиятнинг имкони бўлмасди. Бу — жамоавий ғалаба”.
Бундан олдинроқ СИ шифокорлар эътиборсиз қолдирган кўкрак саратони ҳолатларининг 30 фоизини аниқлаб бергани маълум қилинганди. СИнинг самарадорлигини текшириш учун тадқиқотчилар 1,4 мингга яқин томографик тасвирларни, шу жумладан шифокорлар эътибор бермаган 224 та ўсимтани таҳлил қилган. Натижада СИ уларнинг 73 тасини тўғри аниқлагани аён бўлган — бу барча ўтказиб юборилган ташхисларнинг 32 фоизини ташкил этади.
Изоҳ (0)