Байден Трамп ҳокимиятни топширишдан бош тортса, янада кўпроқ ўлим ҳолатлари содир бўлишини маълум қилди

Президент Дональд Трамп ҳокимиятни тинч йўл билан топширишга тўсқинлик қилса, АҚШнинг коронавирус пандемиясига қарши туриши ва вакциналарни қўлга киритиши имкониятларига путур етиши мумкин. Бу ҳақда АҚШ президентлигига номзод Жозеф Байден маълум қилди, деб хабар беради «РБК».

«Агар биз ўз ҳаракатларимизни мувофиқлаштирмасак, янада кўпроқ одамлар ўлиши мумкин», — дейди Байден пандемиянинг иқтисодий оқибатларига бағишлаб ўтказилган тадбирда. Унинг сўзларига кўра, агарда ҳокимият транзити 20 январга қадар кутиладиган бўлса, АҚШ яна бир ярим ой йўқотади. «Мувофиқлаштириш ҳозир бўлиши лозим — ҳозир ёки имкони борича тезроқ», — дейди демократ.

Financial Times’нинг ёзишича, бу АҚШ президентига босим ўтказиш ва унинг 2020 йилги сайловларда мағлубиятга учраганини тан олдиришга қаратилган энг кескин уринишлардан бири ҳисобланади. Сайловларнинг расмий якуни ҳали маълум қилинмаган: Трамп бир нечта штатда овоз бериш жараёнлари якунлари устидан судга даъво аризасини киритган ва рақибини овозларни сохталаштиришда айбламоқда.

АҚШда президент сайлови 2020 йил 3 ноябрда бўлиб ўтди. 16 ноябрь ҳолатига кўра натижалар ҳали расман эълон қилинмади. Америка ОАВлари Демократлар партиясидан номзод Жо Байденни ғолиб деб топди. Кўплаб мамлакатлар раҳбарлари, хусусан, Жанубий Корея президенти Мун Чже, Туркия президенти Ражаб Тоййиб Эрдўғон, шунингдек, БМТ бош котиби Антониу Гутерриш Жо Байденни АҚШ президентлиги сайловидаги ғалаба билан табриклаган. Россия президентининг матбуот котиби Дмиртий Песков эса Путин «сайлов натижалари расман эълон қилинганидан кейин» табриклашини билдирган. Facebook раҳбари Марк Цукерберг Жо Байденни АҚШ президентлик сайловлари ғолиби деб атади.

14 ноябрь куни Вашингтонда АҚШ президентлик сайлови натижасидан норози бўлган минглаб кишилар амалдаги давлат раҳбари Дональд Трампни қўллаб-қувватлаб митингга чиқди. Унда Трампга қарши бўлганлар ҳам қатнашди ва намойиш тўқнашувга айланиб кетди.