Жаҳон автомобиль саноатида ноёб ҳисобланган, оқ рангдаги ягона Ferrari 250 GTО Bianco Special модели АҚШнинг Флорида штатида ўтказиладиган Mecum аукционига қўйилди, деб хабар бермоқда Auto.ru.
Шасси рақами 3729GТ бўлган ушбу модел нафақат ўзининг тарихий қиймати, балки қатор жиҳатларига кўра коллексионерлар ва автомобиль ишқибозлари эътиборини ўзига тортмоқда.
Биринчи ўзига хос жиҳат — бу Ferrari 250 GТО модели дунёдаги ягона заводдан оқ рангда чиққан нусха эканлиги. Маранелло шаҳридаги Ferrari заводида айнан ушбу автомобиль Bianco Special ранги — марварид тусли оқ рангга бўялган.
Иккинчидан, айнан шу машинани британиялик икки карра Формула-1 чемпиони Грем Хилл ҳайдаб, Гудвуддаги пойгада иккинчи ўринни эгаллаган.
Учинчи эътиборга молик омил бу автомобиль Gran Turisimo 6 видеоўйинида рақамли нусхаси сифатида пайдо бўлганидир. Кейинчалик у Gran Trisimo Sport ва Gran Turisimo 7 ўйинларида ҳам чиққан, бироқ бу гал моделнинг шасси рақами кўрсатилмаган.
Таъкидлаш жоизки, 1962–1964 йиллар оралиғида атиги 36 дона Ferrari 250 GTО ишлаб чиқарилган. Улар орасида оқ рангли модел ягона бўлиб, бу турдаги автомобиллар бозорда жуда камёб ва нархи ниҳоятда қиммат туради.
Охирги марта Ferrari 250 GТО 4,0 В12 двигателли модели 2023 йил ноябрида Sotheby’s аукционида рекорд нарх — 51,7 миллион доллар эвазига сотилган эди. Бунгача ҳам энг қиммат нарх айнан 250 GТО моделига тегишли бўлган: 2018 йилда ушбу автомобиль 48,4 миллион долларга харид қилинган.
Аукцион лотининг нархи эса ҳозирча ошкор этилмаган.
Изоҳ (0)