Жанубий Кореяда прокурорлар ҳокимиятдан четлатилган ва ҳибсга олинган президент Юн Сок Ёлга нисбатан айблов эълон қилди. Бу ҳақда Yonhap хабар берди.
Юн Сок Ёл “исённи бошқарганликда” айбланиб, ҳибсга олинди. Сиёсатчи олти ой ичида бошланиши керак бўлган судгача ҳибсда қолади.
Айблов хулосасида таъкидланишича, президент собиқ мудофаа вазири Ким Ён Хён ва бошқа шахслар билан тил бириктириб, 2024 йил 3 декабрь куни уруш, қуролли тўқнашув ёки шунга ўхшаш миллий инқироз аломатлари бўлмаса-да, “конституцияга зид ва ноқонуний” ҳарбий ҳолат жорий этиш орқали қўзғолон чиқаришга уринган.
Бундан ташқари, Юн ҳарбий ҳолатни бекор қилиш учун ўтказиладиган овоз беришни барбод қилиш мақсадида парламентга ҳарбийларни юбориш, Миллий сайлов комиссияси ходимларини қамоққа олишни режалаштирганликда ҳам айбланмоқда.
Лавозимидан четлаштирилган президент ҳимоячилари қўзғолонга ундаш бўйича қўйилган айбловни рад этиб, уни судда муҳокама қилишларини билдирди. Улар ҳарбий ҳолат эълон қилиниши исён сифатида баҳоланиши мумкин эмаслигини таъкидлади.
Юн Сок Ёлнинг ҳибсга олиниши
15 январь куни Жанубий Кореяда терговчилар иккинчи уринишда Юн Сок Ёлни ҳибсга олди. Ҳокимиятдан четлатилган президентни ҳибсга олишга биринчи уриниш 3 январь куни содир бўлганди. Бироқ ўшанда Юн Сок Ёлнинг қўриқчилари полиция ҳибсга олишига қаршилик қилган. Иккинчи уринишда эса узоқ давом этган қарама-қаршиликдан сўнг, терговчилар президентни Коррупция бўйича тергов бюросига олиб боришга муваффақ бўлди.
Юн Сок Ёл ушлангунга қадар видеомурожаат эълон қилиб, ҳибсга олишни “ноқонуний” деб билиши, аммо қон тўкилишининг олдини олиш учун терговчилар ва полицияга бўйсунишга қарор қилганини айтган.
Декабрь ойи бошида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди, шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган. Унинг ўзи декабрнинг биринчи ярмидаёқ қўзғолонга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Президент адвокатларининг ҳибсга олишнинг қонунийлигига эътироз билдиришга уриниши туфайли унинг 48 соатлик қамоқ муддати тўхтатилганди. Кейинги ҳибсга олиш учун янги ордер чиқарилган.
Изоҳ (0)