Марказий сайлов комиссиясининг навбатдаги мажлиси 29 октябрь куни бўлиб ўтди. Бу ҳақда МСК матбуот хизмати хабар берди.
Мажлисда ҳудудий сайлов комиссияларининг сиёсий партияларга берилган овозларни аниқлаш тўғрисидаги баённомаларига асосан ягона сайлов округи бўйича Қонунчилик палатасига сайлов натижаларини белгилаш ва депутатлик мандатларини сиёсий партиялар ўртасида тақсимлаш тўғрисидаги масала кўриб чиқилди.
Ягона сайлов округи бўйича Қонунчилик палатасига сайловда депутатлик ўринлари сиёсий партиялар ўртасида қуйидагича тақсимланди:
- Ўзбекистон либерал-демократик партияси – 26 та депутатлик ўрни;
- “Миллий тикланиш” демократик партияси – 14 та депутатлик ўрни;
- Халқ демократик партияси – 13 та депутатлик ўрни;
- “Адолат” социал-демократик партияси – 12 та депутатлик ўрни;
- Экологик партияси – 10 та депутатлик ўрни.
Депутатлик мандатлари тақсимланган сиёсий партиялар ва партия рўйхати бўйича сайланган депутатларга хабарномалар юбориш белгиланди.
Аввалроқ депутатлик сайловининг дастлабки натижалари эълон қилинганди.
Ўзбекистонда Олий Мажлис Қонунчилик палатаси ва маҳаллий кенгашлар депутатлари сайловида овоз бериш жараёни 27 октябрь куни 11 минг 28 та сайлов участкаларида соат 08:00 да бошланиб, соат 20:00 гача давом этди.
Бу йилги сайловларда сайлов жараёнини бошқаришнинг автоматлашган тизимидаги сайловчиларнинг электрон рўйхатига Ўзбекистондаги 19 миллион 944 минг 859 нафар сайловчи киритилганди. Бундан ташқари, чет эллардаги сайловчилар 165 минг 631 нафарни ташкил этди. Шундан 140 388 нафари сайловда иштирок этди.
40 та хорижий давлатдаги Ўзбекистон дипломатик ваколатхоналарида 57 та сайлов участкалари ташкил этилган. Хориждаги сайлов жараёнларининг дастлабкиси Япония ва Корея Республикасидаги дипломатик ваколатхоналарида Тошкент вақти билан соат 04:00 да бошланди. Овоз бериш жараёнларининг сўнгиси АҚШдаги ваколатхоналарда Тошкент вақти билан 28 октябрь соат 05:00 да якунланди.
27 октябрь соат 13:00 ҳолатига кўра, 19 944 859 нафар сайловчидан 9 948 589 нафари ёки 47,62 фоизи овоз беришда иштирок этди ва депутатлик сайлови ўтган деб ҳисобланди.
Бу йилги сайловлар янгиланган Конституция ва миллий сайлов қонунчилигига биноан, аралаш сайлов (мажоритар-пропорсионал) тизими асосида ўтказилди.
Изоҳ (0)