АҚШ Афғонистон ва Ироқда 2,5 минг нафардан ҳарбийни қолдиради. Дональд Трамп маъмурияти тахмин қилишича, қўшинлар 15 январгача олиб чиқиб кетилади. Афғонистондан 2 минг, Ироқдан 500 киши чиқариб юборилади. Бу ҳақда «Коммерсантъ» хабар бермоқда.
«Президент Трампнинг фармони ва кучларни қайта гуруҳлаш бўйича режага мувофиқ, 2021 йилнинг 15 январига келиб, Афғонистонда 2,5 минг кишилик кучларимиз қолади, худди шу кунга келиб, Ироқда ҳам 2,5 минг киши қолади», — деди АҚШ мудофаа вазири вазифасини бажарувчи Кристофер Миллер.
Трампнинг режасига кўра, Ироқ ва Афғонистондан қўшинлар 2021 йил майгача қайтарилади, деди президентнинг миллий хавфсизлик бўйича маслаҳатчиси Роберт ЎБраен. Унинг сўзларига кўра, Ироқ ва Афғонистонда қолган ҳарбийлар Американинг дипломатик ваколатхоналарини ва ҳукуматга қарашли объектларни ҳимоя қилади.
Ҳарбийлар сони сентябрдагига нисбатан анча камаяди. Ўша ойдаги маълумотларга кўра, Афғонистонда 8,6 минг, Ироқда эса 5,2 минг ҳарбий бўлган.
АҚШда президент сайлови 2020 йил 3 ноябрда бўлиб ўтди. 16 ноябрь ҳолатига кўра натижалар ҳали расман эълон қилинмади. Америка ОАВлари Демократлар партиясидан номзод Жо Байденни ғолиб деб топди. Кўплаб мамлакатлар раҳбарлари, хусусан, Жанубий Корея президенти Мун Чже, Туркия президенти Ражаб Тоййиб Эрдўғон, шунингдек, БМТ бош котиби Антониу Гутерриш Жо Байденни АҚШ президентлиги сайловидаги ғалаба билан табриклаган. Россия президентининг матбуот котиби Дмиртий Песков эса Путин «сайлов натижалари расман эълон қилинганидан кейин» табриклашини билдирган. Facebook раҳбари Марк Цукерберг Жо Байденни АҚШ президентлик сайловлари ғолиби деб атади.
14 ноябрь куни Вашингтонда АҚШ президентлик сайлови натижасидан норози бўлган минглаб кишилар амалдаги давлат раҳбари Дональд Трампни қўллаб-қувватлаб митингга чиқди. Унда Трампга қарши бўлганлар ҳам қатнашди ва намойиш тўқнашувга айланиб кетди.
Изоҳ (0)