Lego “Формула-1” пойгачилари учун ҳақиқий ўлчамдаги спорткарларни ишлаб чиқди. Бу ҳақда конструкторлар ишлаб чиқарувчи компаниянинг Х саҳифасида хабар берилди.
Ҳар бир яратилган машина тахминан бир тонна оғирликда бўлиб, 400 мингдан ортиқ қисмлардан иборат. Lego муҳандисларига “Формула-1”нинг ҳақиқий автомобилларидан силлиқ юзали пойга шиналари берилди. Шунингдек, мутахассислар ҳақиқий спорткарнинг дизайни, ташқи безаклари ва рангини иложи борича бирдек аниқ такрорлашга ҳаракат қилишди.
Ҳар бир автомобилни йиғиш Lego ходимларидан анчагина куч ва вақт талаб қилди: ҳар бир машинани тайёрлашда 26 нафар мутахассис жами 22 минг соат меҳнат қилди.
“Улар соатига 20 километр тезликка чиқиши мумкин дейишяпти — бу жуда зўр тезлик! Қизиқ, лего автомобили билан тўқнашса бўлармикан? Ҳар бирини қуришга минглаб соат кетган дейсизми? Йўқ, унда яхшиси унга урилиб кетмаслик керак. Очиғи, лего автоси мен кутганимдан ҳам чиройлироқ кўринишга эга экан!” деди пойга иштирокчиларидан бири Жорж Расселл.
Мазкур машиналар фақатгина кўргазмали безак эмас, у ҳақиқий ҳаракатланиш воситаси сифатида ҳам ишлатилиши мумкин.
Пойгачилар Lego машиналари функцияларидан фойдаланиб, 5,412 километр узунликдаги трек бўйлаб парад ўтказишди. Бироқ айрим авариялар ҳам юз берди, чунки бундай спорт автомобиллари билан манёвр қилиш осон бўлмаган.
Изоҳ (0)