Матҳура қишлоғида яшовчи ҳиндистонлик 32 ёшли эркак YouTube’да кўричакни олиб ташлаш бўйича видеоларни кўриб, ўзида юзага келган аппендицитни бартараф этишга уринди, дея ёзади Times of India нашри.
Узоқ вақтдан бери ўзидаги жуда кучли қорин оғриғидан қийналаётган 32 ёшли Ражабабу Кумар бу ҳолат аппендицит бўлиши мумкинлигини тушуниб, бу вазиятни ўз қўлига олишга қарор қилди. 19 март куни у хонасига қамалиб олиб, ўзига оғриқ қолдирувчи дорини укол билан юборди, сўнг кўричак қўшимчасидаги яллиғланиш қисмини пайпаслаб, ўша ерини аввалроқ тиббиёт дўконидан сотиб олган махсус скалпел билан кесди. Аммо эркак ўз ишини давом эттира олмади, чунки унда кучли қон кетиши бошланган эди.
Ражабабу яраланган тери қисмини тика олмади ва охир-оқибат у нималар қилганини оила аъзоларига айтишга мажбур бўлди. Қариндошлари уни оғир аҳволда туман касалхонасига олиб келишди. Шифокорлар тезда жароҳатни тикишди ва Кумарни Аградаги бошқа тиббиёт марказига юборишди. У ерда беморга барча керакли ёрдам кўрсатилди.
Изоҳ (0)