Хитойлик рассом “Ғарбга саёҳат” сериалидаги мингдан ортиқ қаҳрамон образларини тухум пўстлоғига моҳирона ўйиб ишлагач, Гиннеснинг рекордлар китобига киритилди. Бу ҳақда Гиннес рекордлари расмий сайтида хабар берилди.
Пекинлик Ма Чао исмли эркак 35 ёшида ҳаётини тубдан ўзгартиришга қарор қилди: у 3D дизайнерлик ишини ташлаб, тухум пўстлоғига расмлар чизиш билан шуғуллана бошлади. Собиқ рассом ҳозирда ниҳоятда нозик ва мураккаб иш билан шуғулланиб келмоқда. У аллақачон 1040 та тухум пўчоғига гравюралар ўйиб, “Ғарбга саёҳат” қаҳрамонларининг барчасининг портретини чизган ва “Энг катта ўймакорлик коллекцияси” йўналишида Гиннес рекордчисига айланган.
Тухум пўстлоғи ўймакорлиги — жуда нозик санъат тури бўлиб, қалинлиги атиги 0,3 миллиметр бўлган ўта мўрт юзага мураккаб нақшлар туширишдан иборат. Тухум бир оз енгил ҳаракатдан ҳам синиб кетиши мумкин, шу сабаб рассом гравюрани ўйиш пайтида қўлини қимирлатмасдан ишлашга мажбур. Ишни қийинлаштирувчи яна бир омил — тухумнинг юмалоқ шаклга эга бўлишидир. Портрет чизишда юзанинг нотекис бўлишини ҳам ҳисобга олиш керак.
Ма Чао тасвирлари шу даражада деталлаштирилганки, ҳатто қаҳрамонлар кийимидаги мўйна ҳам аниқ ифодаланган. Бу нақшлар гўё микроскоп остида ишлангандек туюлади. Аммо муаллиф фақат ўз кўриш қобилиятига таяниб меҳнат қилган.
Рассомнинг тан олишича, тухум пўстлоғи ўймакорлиги санъатини ўрганиш осон бўлмаган. Бу йўлда у кўплаб китоблар устида тунларни бедор ўтказган, ушбу ишга қизиққан инсонлар билан мулоқот қилган, қўлида пичоқ билан чексиз машқ қилган ва кўплаб тухум пўчоқларини синдирган.
Маълумот учун, “Ғарбга саёҳат” сериали 1986 йилда экран юзини кўрган ва XVI асрда ёзилган шу номдаги романга асосланган Хитой сериалидир. Асарда буддист роҳиб Сюансзаннинг Ҳиндистонга қилган саёҳати ҳақида ҳикоя қилинади. 100 бобдан иборат асар Хитой анъанавий адабиётининг “тўрт буюк романи” сирасига киради. Унинг асосида суратга олинган сериал эса мамлакатда мунтазам равишда телевидениеда намойиш этилади.
Тухум пўстлоғи ўйма санъати эса Хитойда Мин ва Син сулолалари давридан бери мавжуд бўлиб, бугунги кунда унутилган санъат турига айланиб бормоқда. Аммо мамлакатда уни қайта тиклашга ҳаракат қилинмоқда. Масалан, 2023 йилда Гансу провинциясидаги Ланчжоу номли табиий ресурслар атроф-муҳит университетининг этник ҳунармандчилик коллежи дастурига тухум ўймакорлиги фани янги дарс сифатида киритилган.
Изоҳ (0)