Бразилиянинг Пернамбуко штати фуқароси Гамилтон Таурино дунёдаги энг яхши касб эгаси эканлигига даво қилиши мумкин: у уй ҳайвонларини ветеринарга олиб бориш ёки бирор жойга етказиб қўйиш билан шуғулланади.
Bored Panda порталига берган интервьюсида Таурино ҳайвонлар учун такси хизмати ташкил этиш фикри қандай келиб қолгани ҳақида сўзлаб берди. Кунларнинг бирида унинг дўсти итини ветеринарга олиб боришга рози бўладиган ҳайдовчи топа олмаганини айтади. Бир қарашда ёқимсиз бўлган тажриба кейинчалик муваффақиятли бизнеснинг бошланишига сабаб бўлган.
Аввалига Гамилтон учун уй ҳайвонлари эгалари билан тил топишиш қийин кечган ва турли фавқулодда вазиятларга дуч келган:
“Ҳайвонлар бегона одам — мени олдимда ўзини ёмон тутар, ҳайдовчи машинасига ўрганиши қийин бўлар эди. Сўнг атрофдаги касалхоналар ва клиникаларни ўрганиб чиқиб, қайси бири 24 соатлик хизматларни таклиф қилишини аниқлаш керак бўлди. Шунингдек, уй ҳайвонлари учун махсус хавфсизлик камарлари ва уларни ташиш учун сумкаларни сотиб олдим”, дейди Таурино.
Вақт ўтиши билан ноодатий такси бизнеси ривожланиб, ҳозирда у доимий мижозларга ҳам эга. Баъзи ҳайвонлар ҳатто машинадан тушишни истамай, эгасига қайтишга шошмайди.
Гамилтон мижозлар билан тушган суратларни тез-тез Instagram’га жойлаб боради. Ҳайдовчининг энг ноодатий мижозларидан бири денгиз чўчқаси бўлган. Бир куни ҳайвон, қафасидан қочиб кетиб, узоқ вақт қидирилган, сўнг машина ўриндиғининг остига яширинган ҳолда топилган.
Изоҳ (0)