Филиппинда жойлашган Campuestohan Highland Resort номли курорт зонасида баҳайбат хўроз шаклидаги меҳмонхона очилди. Бино нафақат хўроз шаклидаги энг катта иншоот сифатида Гиннеснинг рекордлар китобига кирди, балки кўплаб сайёҳларни ўзига жалб қиладиган кучли маркетинг воситасига айланди.
Нега айнан хўроз шаклида?
Рикардо Кано Гвапо Тан исмли маҳаллий тадбиркор миллионлаб филиппинликларни иш билан таъминлайдиган ва минтақадаги паррандачилик саноатига ҳурматни ифода этадиган бизнесни йўлга қўйишни қарор қилди. Унинг мақсади нафақат меҳмонхона қуриш, балки аҳоли диққатини тортадиган ва меҳмонлар хотирасида узоқ вақт ижобий таассуротлар қолдирадиган рамзий ҳудуд ташкил қилиш бўлган.
456 кун давом этган қурилиш ишларидан сўнг меҳмонхона 2024 йилнинг сентябрь ойида ташриф буюрувчилар учун ўз эшикларини очди ва тез орада курорт зонанинг асосий диққатга сазовор масканига айланди.
Меҳмонхонадаги барча хоналар кондиционер, кинг-сизе каравотлар, катта телевизорлар ва замонавий ҳаммом билан жиҳозланган. Ҳар бир номерда атрофдаги тоғларнинг ажойиб манзарасига қараган терраса мавжуд. Бу ерда бир кеча қолиш нархи 100 доллардан бошланади.
Мазкур меҳмонхона ноанъанавий ғоялар ва дадил қарорлар ҳар қандай брендни ривожланишнинг янги босқичига олиб чиқиши мумкинлигини яна бир бор исботлайди.
Изоҳ (0)