2026 йилда HBO’да намойиш этилиши режалаштирилган “Гарри Поттер” сериали учун махсус суратга олиш майдони қурилиши бошланди. Collider нашрининг ёзишича, лойиҳа мини-шаҳар кўринишида бўлади ва Warner Bros. компанияси қурилиш ишлари учун бир миллиард фунт стерлинг (1,25 миллиард АҚШ доллари) сарфлайди.
Янги шаҳар илгари “Гарри Поттер” фильмлари суратга олинган Хертфордшир графлигидаги Leavesden киностудияси ҳудудида барпо этилади. Мажмуа таркибига янгиланган Тисовая кўчаси, йўллар, автотураргоҳлар, ёш актёрлар учун мактаб, тиббиёт маркази ва суратга олишда иштирок этадиган ҳайвонлар учун махсус иншоотлар киради.
The Sun нашри маълумотларига кўра, мини-шаҳар “кичик мегаполис” каби фаолият юритади. Бу ерда нафақат декорациялар, балки суратга олиш гуруҳлари ва актёрлар учун зарур барча инфратузилмалар қад кўтаради. Майдондан сериалнинг бир нечта мавсуми давомида фойдаланиш режалаштирилган.
Дюрслилар уйи янгича кўринишда — Тюдор услубида қурилади. Бу орқали сериалга аввалги фильмлардан фарқли визуал кўриниш берилиши кўзда тутилган.
Айни пайтда катта ёшдаги актёрлар таркиби эълон қилинган: Минерва Макгонагал ролида — Жанет Мактир, Северус Снейп — Паапа Эссиэду, Aлбус Дамблдор — Жон Литгоу, Рубеус Ҳагрид — Ник Фрост, Argus Филч — Пол Уайтхаус, профессор Квиррелл — Люк Таллон. Гарри, Рон ва Гермиона роллари учун танлов ҳали якунланмаган, ушбу роллар учун 32 мингдан ортиқ ёш актёр кастингда иштирок этгани маълум.
Изоҳ (0)