2001 йил ноябрь ойида Жоан Роулингнинг сеҳргар бола ҳақидаги “Гарри Поттер ва ҳикматлар тоши” (1997) романи илк бор экранлаштирилди. Фильм жамоатчилик томонидан шу қадар ижобий қарши олиндики, ишлаб чиқариш учун 125 миллион доллар ва фильм тарғиботи учун яна 40 миллион доллар маблағ сарфлаган фильм кассада 1 миллиард доллар йиға олди. 2024 йил ҳолатига кўра, мазкур лойиҳа барча даврларнинг энг юқори даромад келтирган фильмлари рўйхатида 49-ўринни эгаллаб турибди.
Франшизада Гарри, Гермиона ва Рон исмли бош қаҳрамонлар — Хогварц мактаби ўқувчилари ҳақида ҳикоя қилинади. Унда Дэниел Рэдклифф, Эмма Уотсон ва Руперт Гринт каби актёрлар ўйнаган. Гарри Поттер образи учун бош қаҳрамонни топиш бутун кастинг жараёнининг энг қийин қисми бўлган. Бошқа роллар учун деярли барча актёрлар аллақачон танланган вақтда Гаррига даъвогарлик қиладиган бола топилмаган.
Сўнг ёш Девид ролини ўйнаган “Девид Копперфилд” фильмини тасодифан томоша қилган режиссёр Крис Колумб шу заҳотиёқ ўзларига керак бўлган актёр ким эканлигини англаб етган. Аввалига Редклиффнинг ота-онаси бунга рози бўлмаган, уларни кўндиришга режиссёр узоқ вақт уринган ва охир-оқибат масала ижобий ҳал қилинган.
Франшиза сеҳрли оламга шўнғишга мажбур қиладиган ажойиб сюжет ва унутилмас қаҳрамонларга тўла, аммо энг мукаммал тарзда ишланган фильмларда ҳам кичик хатолар учраб туради. Қуйида эътиборли томошабинлар нигоҳидан четда қолмаган қизиқарли хатоликларни кўриб чиқамиз.
1. Кўйлакнинг ўзгариб қолиши
Гарри ҳайвонот боғига боришдан аввал амакиси Вернон билан ташқарида суҳбатлашади. Бу саҳнада Дэниэл қаҳрамони футболкаси устидан сиёҳранг кўйлак кийган. Аммо Вернон амакининг орқасидан кўрсатилган кадрда Гаррининг кўйлаги эгнидан тушиб кетган ҳолатда эканлигини кўриш мумкин.
2. Чандиқнинг йўқолиб қолиши
“Гарри Поттер ва ҳикматлар тоши”даги саҳналардан бирида Гарри Олливандер дўконида таёқча танлашга келади. Навбатдаги таёқчани синаб кўраётган пайтда аввал унинг пешонасида машҳур чақмоқ шаклидаги чандиқ кўринмайди. Аммо кейинги кадрда унинг сочлари орқага учиб, пешонаси очилганда чандиқ тўсатдан пайдо бўлиб қолади.
3. Ўқувчилар ўрнининг алмашиб қолиши
Факультетларга тақсимловчи шляпа Гаррини Гриффиндорга йўналтиргандан сўнг, у факультет столига бориб, Роннинг ёнидан жой олади. Сўнг Albus Дамблдор зиёфатга ижозат бергач, Гарри ўтирган стол кўрсатилади. Бу вақтда қаҳрамон эндиликда Гермиона ва Перси ўртасида ўтирган ҳолатда намоён бўлади.
4. Факультетларга тақсимлаш маросими
Кўпгина мухлислар Хогварцдаги факультетларга тақсимлаш маросими нега асл манбадаги каби алифбо тартибида эмас, балки тартибсиз ўтказилганига ҳайрон қолади. Бундай ҳолатда чекланган экран вақтини ҳисобга олинса, Поттерни кутиш учун узоқ муддат талаб этилар эди. Аммо нима учундир сюжетнинг кейинги қисмида ҳеч қандай рол ўйнамаган баъзи болалар кўрсатилган? Масалан, Сюзан Боунс исмли қиз фильм бошида Пуффендуй факультетига юборилади. Ушбу ролни Крис Коламбуснинг қизи Элеонора Колабмус ижро этган. Кейинчалик у “Гарри Поттер ва махфий ҳужра”да ҳам иштирок этган.
5. Сочлар
Сюжетга кўра, “Гарри Поттер ва ҳикматлар тоши”да Квиринус Квиррел кал кўринишда бўлган, бироқ фильм давомида баъзи кадрларда актёр кийган салла остидан қора сочлар кўзга ташланади.
6. Квиддич
Гриффиндор квиддич жамоасининг сардори ва дарвозабони Оливер Вуд Гаррини майдонга олиб келади ва ўйин қоидалари билан таништиради. Шу вақтда кадрда уларнинг ортида йўл кўриниб туради. Кейин машғулотлар майдони Ҳогварц минораларидан бирининг баландлигидан кўрсатилганда ортдаги йўл йўқолади ва ям-яшил майдон қолади.
Изоҳ (0)