Персонажнинг кийим-кечаги фильмнинг муҳим қисми бўлиб, томошабинлар буни кўпинча эътибордан четда қолдиради. Аммо бу хато. Кийим дизайнерлари ўз ишларига сюжетни чуқурроқ англашга ёки қаҳрамоннинг характерини тушунишга ёрдам берадиган яширин маъноларни сингдирадилар.
“Титаник”
Либос дизайнери Дебора Линн Скоттнинг фикрича, бош қаҳрамон кўйлакларининг ранглари томошабинга Роузнинг характер хусусиятларини очиб бериши лозим эди. Чунончи, қора ярим шаффоф тўр билан қопланган ёрқин қизил кўйлак қизнинг эҳтиросли ва ўжар табиатини кўрсатади, бироқ у амал қилишга мажбур бўлган қатъий ижтимоий меъёрлар билан чекланган. Аммо қаҳрамоннинг либослари ҳақидаги ҳикоя фақат шугина эмас.
Якуний саҳнада Роуз яна “Титаник”да пайдо бўлади, бироқ бу сафар оқ либосда. Эътиборли жиҳати шундаки, бу либоснинг дизайни ва бичими Роуз Жек билан илк бор учрашганида кийган қизил кўйлакка айнан ўхшайди. Бу эса бизга қаҳрамонлар ва уларнинг муҳаббати йўлида энди ҳеч қандай тўсиқ қолмаганини англатади.
“Гарри Поттер ва қақнус ордени”
“Гарри Поттер”ни ўқиганлар Нимфадора Тонкснинг сочлари сақичдай пушти рангда бўлганини эслайди. Бироқ фильм яратувчилари қаҳрамоннинг сочларини тўқ бинафша рангга бўяшга қарор қилишди. Бунинг сабаби шундаки, томошабинларда мустаҳкам ассоциация ҳосил бўлиши керак эди: пушти рангни ёвуз шахс кияди. Ва бу ранг билан персонаж ўртасидаги боғлиқлик ҳақиқатан ҳам онгимизда чуқур ўрнашиб қолади.
Сеҳргарлик вазирининг ёрдамчиси ва қора кучлардан ҳимояланиш фани ўқитувчиси Долорес Амбриж пушти рангни ҳар қандай кўринишда яхши кўради. Қизиқ қонуният: профессор Амбриж қанчалик ғазабланса, унинг кийимларидаги пушти ранг шунчалик ёрқинроқ тусга киради.
“Кичик хонимлар”
Фильмнинг бошидан охиригача Лори ва Жо бир хил нимча кийиб юришади. Бу уларнинг ўртасидаги алоҳида риштани кўрсатиш мақсадида ўйлаб топилганди. Бундан ташқари, либослар бўйича рассом Жаклин Дюрран актриса Сирша Ронан билан ҳамкорликда Жо учун рамзий кийим-кечак яратди. Қиз роман ёзаётган пайтда доимо яшил ҳарбий камзул кийиб олади, бу унинг қатъиятли ва кучли руҳиятини ифодалайди.
“Сувнинг шакли”
Фильмдаги Элайза дастлаб ҳеч ким билан сўзлашмайдиган, рангсиз кийимлар кийган ва кўзга ташланмайдиган аёл сифатида тасвирланади. Бироқ Элайза амфибия одам билан учрашгач, ҳамма нарса ўзгаради. Аёл унга ошиқ бўлади ва бу янги ҳис-туйғу жимгина юрувчи фаррошни қандай ўзгартираётганини кўрамиз. Элайза қизил рангдаги кийимлар кийишни бошлайди, бу унинг эҳтиросли табиатидан дарак беради.
“Ёзнинг 500 куни”
Дастлабки титрлардаёқ, Том ва Саммернинг болалик кадрлари кўрсатилганда, қаҳрамонларга икки хил ранг бириктирилганини кўриш мумкин: жигарранг — Том учун, кўк — Саммер учун. Саммер Том ҳаётининг бир қисмига айлангач, унинг атрофида дарҳол кўплаб мовий ва кўк ранглар пайдо бўлади. Мисол учун, қаҳрамон мовий кийимдаги одамлар қуршовида бахтли рақс тушаётган эпизодда. Шу тарзда биз Том айни пайтда фақат севгилиси ҳақида ўйлаётганини тушунамиз.
“Аловуддин”
Янги фильмда малика Жасминнинг кўплаб ажойиб либослари намойиш этилади, улар томошабинларга қаҳрамоннинг ўзига хос хусусиятларини очиб беради. Маликанинг анъанавий ёрқин феруза либосига энди нозик мунчоқлар билан нафис кашта тикилган. Пардада товус тасвири берилган, бу бежиз эмас. Бу чуқур маъноли рамзий ифода: қирол боғида тутқунликда қолган товус малика сингари озодликка интилади.
“Темир хоним”
Мерил Стрип Маргарет Тетчер қиёфасида ҳокимият ва жамиятдаги барқарор мавқейини кўрсатиши керак бўлганда нафис бичилган икки қисмли костюм, марварид ва бантли блузка кияди. Энг муҳим саҳналарда бу таъсир қаҳрамоннинг севимли ранги — кўк тус ҳисобига янада кучаяди. Тетчер бош вазирлик лавозимини тарк этишга мажбур бўлганида у биринчи марта қизил рангли костюм кияди. Бир томондан, у шу тарзда ўзининг кучли ва ўжар табиатини ҳамда курашни давом эттиришга тайёрлигини билдиради. Бошқа томондан, бундай либос қаҳрамоннинг энди вазиятни назорат қила олмаслигига ишора қилади.
“Сумерки”
“Сумерки” асарининг муаллифи Стефани Майер китобларида Калленларнинг оилавий герби ҳақида ҳеч нарса айтмаган. Бироқ фильм яратувчилари бу қаҳрамонлар учун оила энг муҳим қадрият эканлигини кўрсатиш мақсадида вампирлар қиёфасига герб тасвири туширилган аксессуарларни қўшишга қарор қилишди. Эммет, Жаспер ва Эдвард ўнг қўлига чарм билагузук тақишган. Розали катта тақинчоқни, Элис эса маржонни маъқул кўради. Карлайл чап қўлига ўйма нақшли кумуш узук таққан бўлса, Эсме кумуш билагузук тақиб олган.
“Қиндан чиққан пичоқлар”
Рансом бойлик ва эркка ўрганиб қолган йигит бўлиб, қимматбаҳо кийимларига эътибор беришни хаёлига ҳам келтирмайди. Унинг кийимлари ачинарли ҳолатда эканини кўрамиз: оч жигарранг свитерида катта-катта йиртиқлар бор, енг учлари ва ёқаси ҳам танг аҳволда. Бу орқали бизга Рансомнинг ўзига хос шахсиятини кўрсатмоқчи бўлишган — у на пулни, на унга бу пулни бераётган одамларни, яъни ўз оиласини ҳурмат қилади.
“Гранд Будапешт меҳмонхонаси”
Мадам Селин Вилнев Дегофф-унд-Таксис хонимнинг кийимларида тарихнинг турли даврлари атайлаб бирлаштирилган. Унинг қизил палтоси ва шляпаси 20 йиллардан, кўйлаги 30 йиллар бошидан, соч турмаги эса тўғридан тўғри Ғаройиб даврдан олинган. Услубларнинг бундай қоришмаси Д. хонимнинг ўтмишдан қутула олмаслигини ифодалайди, шунингдек, қаҳрамоннинг озгина ақлдан озганини ҳам кўрсатади.
Изоҳ (0)