Баъзи фильмлар қизиқарли сюжети билан томошабинларни экран қаршисига шу қадар михлаб қўядики, майда деталлар эътибордан четда қолиши мумкин. Баъзан биргина кичик детал кадрни ёки ҳатто бутун кинокартинага бўлган муносабатимизни бутунлай ўзгартиради.
“Жокер”
Шов-шувга сабаб бўлган “Жокер” фильми ҳақида қизиқарли маълумот: ундаги барча соатлар 11:11 ни кўрсатади. Мухлислар бу ҳодиса юзасидан турли назарияларни илгари суришган. Шулардан бирига кўра, соатлар ишламайди, чунки барча воқеалар Артурнинг хаёлида кечади.
“Брижертонлар”
Пенелопанинг турли образларини кўпинча капалак тўлдиради — хоҳ у кўйлакдаги безак бўлсин, хоҳ аксессуар. Бу бежиз эмас — кўплаб маданиятларда тангачақанотлилар қайта туғилиш ва ривожланиш рамзи ҳисобланади. Қурт чиройли капалакка айланганидек, Фезерингтон оиласи ҳам юқори табақа вакиллари орасида ўз ўрнини топади.
“Соҳибжамол”
“Соҳибжамол” фильмида Вивиан Эдвардни табиат қўйнида дам олишга кўндиради. Ошиқ-маъшуқлар дарахт остида ётган саҳнада эркак қизга Шекспир иқтибослари тўпламидан 29-сонетни ўқиб беради. Бу сонет “Гўзал ёшлик” туркумига киради ва унда лирик қаҳрамон ўзининг қувғинди ва омадсиз тақдирига аза тутади, аммо муҳаббат унга тушкунликка тушмасликка ёрдам беради.
Дарвоқе, яна бир қизиқ ўхшашлик, мелодрамада рол ўйнаган актёрлар — Ричард Гир ва Жулия Робертс исмларининг биринчи ҳарфлари Шекспирнинг машҳур ошиқлари — Ромео ва Жулетта исмларининг биринчи ҳарфларига тўғри келади.
“Титаник”
“Титаник” фильмида Роузнинг кема фожиасидан кейинги ҳаёти ҳақида ҳикоя қилувчи фотосуратларини кўриш мумкин. Бу билан режиссёр Роуз ниҳоят оиласи ва жамиятининг умидларидан озод бўлиб, ёрқин, саргузаштларга бой ҳаёт кечираётганини таъкидлайди.
Расмлардан бирида Роуз от миниб, Жек уни олиб боришга ваъда берган пляж фонида ўтирибди. Аввалроқ у билан суҳбатда аёл эгарсиз от миниш ғоясини бемаъни деб ҳисоблаган, аммо фотосуратда қиз ўз фикрини ўзгартиргани кўрсатилган. Шунингдек, у ерда Роузнинг эри ва болаларининг ягона сурати бор.
Яна бир қизиқарли тафсилот фильм финалида яширинган, ўшанда Роуз кемада учратган барча одамларни эслайди. Навбат Жекка етганда, унинг орқасидаги соат тахминан 2:20 ни кўрсатади — бу айнан “Титаник” чўкиб кетган вақт эди.
“Қироличанинг юриши”
Сериалнинг сўнгги қисмида, асосий рақибини енгганидан кейин Бет оппоқ кийимда пайдо бўлади. Бу шунчаки чиройли кўриниш учун қилинмаган.
Кийимлар дизайнери ғоясига кўра, энди Бет шахмат тахтасидаги қиролича, шахмат тахтаси эса бутун дунёни англатади.
“Келажакка қайтиб”
“Келажакка қайтиб” фильмида Марти ўтмишга қайтиб, автомобиль иккита дарахтдан бирига урилганидан кейин “Икки қарағай” савдо марказининг номи “Ёлғиз қарағай”га ўзгартирилади. Бу кулгили детал келажакдаги муқаррар ўзгаришларни таъкидлайди, бу эса вақт бўйлаб саёҳатга олиб келади.
“Барби”
Ҳақиқий дунёда пайдо бўлган Барби биринчи марта Mattel корпорациясининг ходими қизи Саша билан учрашади. Мухлислар тахминига кўра, Саша номи 2001 йилда Барбининг рақиби сифатида чиқарилган машҳур Братз қўғирчоғидан олинган. Ушбу назариянинг тасдиғи фильмдаги қизнинг лақаби — “Банни Бу” ҳам Сашанинг лақаби — Bratz қўғирчоғи эканлигидир.
“Гарри Поттер ва Азкабан асири”
Франшизанинг учинчи қисмида Гаррига Тешик қозонга келгач, Стивен Хокингнинг “Вақтнинг қисқача тарихи”ни ўқиётган меҳмонни кўрсатиб ўтишади. Китобда коинотнинг пайдо бўлиши, макон ва вақт табиати, қора туйнуклар ҳақида ҳикоя қилинади. Фильм воқеалари 1993 йилда содир бўлади, китоб нашр этилганига эса 5 йил бўлганди.
Эҳтимол, эпизод учун айнан шу китобни танлаш фильмнинг умумий мавзуси — баъзан орқага қайтариш мумкин бўлган вақт билан боғлиқ бўлиши мумкин.
“Шамолларда қолган ҳисларим”
“Шамолларда қолган ҳисларим”да Скарлетт Эшлининг севгисини тан олишни режалаштирган барбекюга қандай бориши кўрсатилади. Энага унга кийинишга ёрдам беради ва ниҳоят Скарлеттнинг ўзи шляпасининг лентасини боғлайди. Бу пайтда унинг бўйнида ҳеч қандай тақинчоқ йўқ. Аммо қаҳрамон барбекюга келганда маржон тақиб олганини кўриш мумкин.
“Форрест Гамп”
Фильмда лейтенант Ден Форрестни масхара қилиб, “Агар сен қачондир креветка овлайдиган кема капитани бўлсанг, ўша куни мен астронавт бўламан!”, дейди. Кейинчалик у Форрестга протезларини кўрсатганида улардан бирига ҳассасини уриб, шундай дейди: “Бу титан қотишмаси. Ундан космик кемаларда фойдаланилади”.
Яна бир ўхшашлик — “Форрест Гамп” чиққанидан бир йил ўтгач, Гери Синис Том Хенкс ҳам рол ўйнаган “Аполлон-13” фильмида космонавт ролини ўйнайди.
“Гарри Поттер ва ҳикматлар тоши”
Франшизанинг биринчи фильмида Гарри Поттернинг чандиғи тантанали кечки овқат пайтида оғрий бошлайди. Буни профессор Снегг пайқайди: у атрофга, кейин эса профессор Квиррелга қарайди. Овқатдан сўнг Снегг профессор билан гаплашишга қарор қилади. Бу томошабинга Гаррининг ҳақиқий душмани ким эканлигига ишора қилади.
Изоҳ (0)