Ҳар биримиз ҳаётимизда муваффақиятга эришишни истаймиз, аммо бунга қандай эришиш мумкин? Кўплаб бой ва машҳур инсонлар муваффақият сари йўлни босиб ўтишда маълум ҳаётий тамойилларга амал қилган. Уларнинг кундалик одатлари, вақтни бошқариш услуби, интизоми ва ўз устида ишлаши ҳаётини ўзгартиришни истаган ҳар бир кишига илҳом манбаи бўлиши мумкин. Қуйида дунёнинг энг муваффақиятли тадбиркорлари амалда қўллайдиган бешта фойдали одат билан танишасиз.
- Қатъият
Муваффақият сари йўл кўплаб муваффақиятсизликлардан иборат бўлади. Муҳими улар устида тўхтаб қолмаслик ва олдинга интилиш. Бу ҳақиқатни энг муваффақиятли миллиардерлар яхши билишади.
Масалан, Apple асосчиси Стив Жобс ўз компаниясининг директорлар кенгаши томонидан ишдан бўшатилган эди. Аммо ўн йил ичида бошқа бизнесларда муваффақиятга эришиб, Apple’га қайтиб келди ва компанияни яна фойдага чиқарди.
Яна бир мисол Уолт Диснейнинг ҳаётидир. У машҳур Walt Disney Productions компаниясини очишдан олдин банкротликка учраган: унинг биринчи анимация студияси Laugh-O-Gram муваффақиятсизликка учради.
Шунингдек, британиялик ёзувчи, ёлғиз она Ж.К. Роулинг ҳам шон-шуҳрат сари осон йўл босмаган. Унинг Гарри Поттер ҳақидаги китобини ҳеч бир нашриёт чоп этишни истамаган: унга 12 марта рад жавоби берилган. Фақат 13-уриниш муваффақият олиб келган ва кейинчалик унга улкан гонорарлар келтирган. Бунга қадар Роулинг нафақага таяниб кун кўрган.
- Мутолаа
Фойда бермайдиган сериаллар ўрнига, муваффақиятли инсонлар кўп китоб ўқишади. Турли жанрдаги китобларнинг ашаддий ишқибози, Microsoft асосчиси Билл Гейтс ана шундай одам. У ижтимоий тармоқларда тез-тез севимли китоблари рўйхатини улашади. Интернетда унинг шахсий кутубхонасидан 100 дан ортиқ асарни топиш мумкин.
Марк Цукерберг ҳам кунни мутолаасиз тасаввур қила олмайди. Бир сафар у ўз аудиториясига ҳар икки ҳафтада биттадан китоб ўқишни режалаштирганини айтган. У ваъдасида туриб, энг ёққан асарларини обуначилари билан бўлишган.
- Кундалик режим
Муваффақиятли инсонлар қоидаларидан яна бири қатъий кундалик режимга амал қилишдир. Бу интизомни мустаҳкамлайди ва ҳар доим яхши ҳолатда бўлишга ёрдам беради. Масалан, тадбиркор Илон Маскнинг иш кунлари соатлаб эмас, балки дақиқалаб режалаштирилган дейишади. Унинг жадвалидан фақат иш эмас, балки шахсий режалари ҳам ўрин олган. Маскнинг айтишича, фақат шундай қилиб ҳаммасига улгуриш мумкин.
Кўплаб машҳур миллиардерлар эса режимни йиллар давомида ўзгартиришмайди. Масалан, Амазон асосчиси Жефф Безос нима бўлишидан қатъи назар, ҳар куни 8 соат ухлашга, эрта 10 дан олдин учрашув белгиламасликка ва албатта оиласи билан нонушта ва кечки овқат қилишга ҳаракат қилади.
- Эрта тонгда туриш
Муваффақиятли одамларнинг аксарияти тушгача ухламайди ва барча муҳим ишларини эрталаб бажаришади. Тадбиркор Ричард Бренсон интервьюларида ҳар доим эрта соат 5 ларда уйғонишини айтади. Бу эса унга иш ва шахсий ишларга кўпроқ вақт ажратиш имконини беради.
The Walt Disney Company раҳбарияти раиси Роберт Айгер ҳар куни 5:30 да уйғонади, шунда у бемалол газета ўқиш, почтани кўриш ва спорт билан шуғулланишга улгура олади.
Oxygen Channel собиқ раҳбари Жерри Лейборн эса ҳар куни соат 6 да уйғониб, ишга кетишдан олдин сайрга чиқади. Бу эса уни кун бўйи энергия билан таъминлайди.
- Спорт
Спортнинг фойдаси ҳаммага аён: ҳар қандай шифокор доимий машғулотлар нафақат танани, балки руҳий ҳолатни ҳам яхшилашини айтади. Муҳими — ўзингизга ёқадиган жисмоний фаолият турини топиш.
Марк Цукерберг жанг санъатини яхши кўради. Ҳар куни ишга боришдан аввал бир соат кураш билан шуғулланади. Ёзда ёки дам олиш пайтларида эса сёрфинг билан шуғулланишни ёқтиради.
Европанинг энг бой кишиси ва Louis Vuitton’нинг эгаси Бернар Арно ҳафтасига тўрт соатни теннисга бағишлайди. Дунёнинг энг муваффақиятли қўшиқчиларидан бири Мадонна эса кўп йиллардан бери ёга билан шуғулланади.
Изоҳ (0)