Машҳур ака-ука ва опа-сингилларининг соясида қолиб кетмаган актёрлар

Голливудда бир-бирига жуда ўхшаб кетадиган актёрлар кўп, бунинг сабаби эса улар чиндан ҳам қариндош эканлигида. Кўпчилик ҳатто хаёлига келтирмаган ака-ука ва опа-сингил юлдузлар ҳақида сўз юритамиз.

Кейси Аффлек — Бен Аффлекнинг укаси

Бен Аффлек “Армагеддон”, “Ўғрилар шаҳри” ва “Бетман” фильмларидаги роллари билан танилган бўлса-да, унинг укаси Кейси ҳам катта муваффақиятга эришди. Улар “Заковатли Уилл Ҳантинг” фильмида биргаликда рол ижро этган, аммо кейинчалик турли йўналишларда ижодларини давом эттиришди. Кейси “Денгиз бўйидаги Манчестер” драмасидаги роли учун “Оскар” мукофотини қўлга киритди, шунингдек, “Interstellar” ва “Оппенгеймер” каби йирик лойиҳаларда ҳам қатнашди.

Жозеф Файнс — Рейф Файнснинг укаси

Рейф Файнс “Гарри Поттер” фильмларидаги Волан-де-Морт ва “Шиндлер рўйхати” фильмдаги Амон Гёт ролларини ижро этиб, жаҳон миқёсида танилди. Унинг укаси Жозеф ҳам кино соҳасида муваффақиятга эришди. У “Ошиқ Шекспир” фильмидаги бош роли учун BAFTA мукофотига номзод бўлди, кейинчалик эса “Чўрининг ҳикояси” сериалида қўмондон Фред Уотерфорд ролини гавдалантирди.

Киран Калкин — Маколей Калкиннинг укаси

Маколей Калкин Кевин Маккалистер ролидан сўнг суперюлдузга айланган бўлса-да, унинг укаси Киран ҳам шу фильмда суратга тушган эди — у Кевиннинг амакиваччаси Фуллер ролини ижро этган. Болалигида Киран акасининг соясида қолган бўлса-да, вақт ўтиб муваффақиятли карьера қура олди. У “Скотт Пилгрим ҳаммага қарши”, “Муви 43” каби фильмларда рол ўйнаган, “Меросхўрлар” сериалидаги роли эса унга жаҳон шуҳрати ва “Олтин глобус” мукофотини келтирди. Бундан ташқари, яқинда актёр “Ҳақиқий оғриқ” лойиҳасидаги иккинчи даражали роли учун “Оскар” мукофотига сазовор бўлди.

Робин Лайвли — Блейк Лайвлининг опаси

Блейк Лайвли “Ғийбатчи” сериали ва “Адалин асри” фильми орқали танилган. Аммо унинг катта опаси Робин Лайвли карьерасини анча олдин бошлаб, машҳур “Твин Пикс” сериалида рол ижро этган. Яқинда опа-сингиллар илк бор “Ҳаммаси биз билан тугайди” китобининг экранлаштирилган фильмида биргаликда суратга тушишди. Айтганча, Блейк болалигида опасининг суратга олиш майдончаларига тез-тез борар ва актриса бўлишни орзу қиларди.

Люк Уилсон — Оуэн Уилсоннинг укаси

Оуэн Уилсон “Париждаги ярим тун” ва “Кадрлар” лойиҳаларидаги роллари туфайли машҳур бўлган. Унинг кичик укаси Люк ҳам кинода карьера қуришга ҳаракат қилган, бироқ акасидек таниқли бўла олмаган. Шундай бўлса-да, у “Тененбаум оиласи” фильмида, “Stargirl” сериалида ва “Чиройли қизлар” шоусида муваффақиятли суратга тушган.

Машҳур ака-ука ва опа-сингилларининг соясида қолиб кетмаган актёрлар

Изоҳ (0)

Мавзуга доир

Daryo.uz | Сизнинг муаммоингиз ечими