Сурхондарё вилоятидаги Сариосиё маҳаллий аэропортини реконструкция қилиш ишлари якунланди. Бу ҳақда Uzbekistan Airports матбуот хизмати хабар берди.
Аэропорт 29 апрель куни Silk Avia авиакомпаниясининг ATR-72-60 самолётида амалга оширилган биринчи техник парвозини қабул қилди.
Аэропорт аэродромининг сунъий сиртки қисми капитал таъмирланди, яъни узунлиги 1 550 метр, эни 35 метр бўлган учиш-қўниш йўлагининг бутун узунлиги бўйлаб икки қатламда, юриш йўлаги ҳамда иккита ATR-72-60 самолёти учун тўхташ жойлари мавжуд перрони асфалт-бетон билан мустаҳкамланди.
Қайд этилишича, 100 нафаргача йўловчига мўлжалланган янги терминал қурилиши ҳам ниҳоясига етмоқда.
Бир ой ичида Сариосиё аэропортига мунтазам рейслар амалга оширилиши режалаштирилган, дея қўшимча қилинади хабарда.
Маълумот учун, бундан аввал Мўйноқ, Қўқон, Шаҳрисабз ва Зомин аэропортлари ҳам реконструкция қилиниб, фойдаланишга топширилган эди.
Изоҳ (0)