Андижон аэропорти 20 мартдан мунтазам йўловчи қатновларини қабул қила бошлайди, деб хабар бермоқда Uzbekistan Airports матбуот хизмати.
Биринчи рейс Тошкент—Андижон—Тошкент йўналиши бўйича амалга оширилади.
Андижон халқаро аэропорти 2023 йилнинг 1 апрелидан бошлаб аэродром қопламаси реконструкция қилиниши туфайли авиапарвозлар учун вақтинча ёпилганди. Аэропортнинг мавжуд учиш-қўниш йўлаги узунлиги 2985 метр ва эни 44 метр бўлиб, йўл қопламасининг юк кўтариш қобилияти пастлиги, шунингдек, замонавий ёритиш тизимининг йўқлиги сабабли кўплаб турдаги самолётларни қабул қилишда ва тунда фаолият олиб боришда чекловлар мавжуд эди.
2025 йил 15 март куни ушбу аэропорт реконструкциясининг биринчи босқичи якунланди. Унинг доирасида аэродром мажмуасининг салмоқли қисми, жумладан, узунлиги 3300 метр ва кенглиги 60 метр бўлган янги 4E тоифали учиш-қўниш йўлаги, юриш йўлаги ва 3 та самолётлар тўхташ жойи бўлган перрон қурилиши якунланди. Терминал биноси эса, ҳозирги ҳолатида қолмоқда. Терминал қисмидаги ишлар реконструкциянинг иккинчи босқичида амалга оширилиши кўзда тутилган.
Келгусида Андижон аэропортига халқаро рейсларни қайта йўлга қўйиш ҳам режалаштирилган.
Изоҳ (0)