Қашқадарё вилоятидаги Шаҳрисабз аэропорти 26 март куни фаолиятини тиклади, деб хабар бермоқда Uzbekistan Airports матбуот хизмати.
Аэропорти икки ҳафталик танаффусдан сўнг мунтазам йўловчи қатновларини қабул қилишни бошлади. Аэропорт учиш-қўниш йўлагида капитал таъмирлаш ишлари олиб борилиши сабаб 13 мартдан бошлаб вақтинчалик ёпилганди.
Танлов натижаларига кўра, қурилиш-таъмирлаш ишларини “Фарғона йўллардан мунтазам фойдаланиш корхонаси” олиб борди.
Хабарда айтилишича, узоқ муддатли фойдаланишдан кейин учиш-қўниш йўлаги сирти мустаҳкамланиб, янги асфалт билан алмаштирилди. Юриш йўлагини таъмирлаш ҳам яқин вақт ичида якунланади.
Шу пайтгача Шаҳрисабз аэропортида самолётларни қабул қилиш имконияти чекланган эди — парвозлар ҳафтасига икки марта кичик Л-410 самолётларида амалга ошириларди. Учиш-қўниш йўлаги таъмирлангандан сўнг аэропорт ўрта масофага мўлжалланган замонавий АТР-72 самолётларини ҳафтасига уч мартагача қабул қилиш имкониятига эга бўлди.
Шавкат Мирзиёев 2023 йилнинг октябрида ўтган йиғилишда Шаҳрисабз аэропортида янги АТР самолёти парвозлари йўлга қўйилиб, Самарқанд, Бухоро, Хоразм ва водий вилоятларига маҳаллий рейслар кўпайтирилишини айтганди.
Изоҳ (0)