Жанубий Кореяда бир ҳафталик мотам эълон қилинди

Жанубий Корея қутқарув хизмати 29 декабрь куни юз берган авиаҳалокат оқибатида 179 киши ҳалок бўлгани, икки киши омон қолганини маълум қилди. Бу ҳақда Yonhap хабар берди.

Ҳалокат Бангкокдан Муанга парвоз қилаётган Jeju Air авиакомпаниясининг Boeing 737-800 самолёти белгиланган аэропортга қўнаётганда ҳалокатга учраганида юз берган. Самолёт бортида 181 киши бўлган. Экипажнинг фақат икки аъзоси омон қолган, улардан бири жиддий жароҳат олган.

Дастлабки маълумотларга кўра, самолёт учиш-қўниш йўлагидан чиқиб кетиб, бетон тўсиқ билан тўқнашган ва ёниб кетган. Экспертлар қуш билан тўқнашув версиясини ҳам илгари сурмоқда. Бу олди шассининг ишдан чиқишига олиб келган бўлиши мумкин. Экипаж қўнишдан олдин аэропорт устидан айланиб учиб, шикастланишни кўз билан баҳолашга ҳаракат қилган.

Кучли ёнғин ва вайронагарчилик қутқарувчиларнинг ишини қийинлаштирган бўлса-да, тезкор хизматлар дарҳол воқеа жойига етиб келган. Жанубий Кореянинг вақтинчалик президенти фожиа қурбонлари хотирасига етти кунлик миллий мотам эълон қилган. Самолётнинг қора қутилари топилган.

Jeju Air авиакомпанияси ҳалок бўлганларнинг оилаларига ҳамдардлик билдирган ва ҳодиса сабабларини аниқлаш учун ҳукумат билан ҳамкорлик қилишини тасдиқлаган. Boeing компанияси терговга техник ёрдам кўрсатишга тайёрлигини маълум қилган.

Бу бир ҳафта ичида кузатилган учинчи авиаҳалокатдир. Биринчиси 25 декабрь куни Қозоғистоннинг Оқтов шаҳрида юз берди. Озарбайжон самолёти қулаши оқибатида 38 киши ҳалок бўлди, 29 киши омон қолди. Авиатехника кўздан кечирилганида тешиклар аниқланди. Озарбайжон президенти самолёт Грозний яқинида ўққа тутилгани, бу самолётни ишдан чиқарганини айтди. Илҳом Алиев Россиядан узр сўраш, айбдорларни жазолаш ва компенсация тўлашни талаб қилди.

Иккинчиси 29 декабрь куни Boeing 737-800 самолёти Осло шаҳрига фавқулодда қўнишни амалга оширди. Амстердамга учаётган самолёт гидравликасида носозлик юз берган. Самолёт Осло аэропортига қўниш чоғида учиш-қўниш йўлагидан чиқиб кетиб, ўтлар устида тўхтаган. ОАВ ҳеч ким жабрланмагани, йўловчилар эвакуация қилингани ҳақида ёзмоқда.