Судан қуролли кучлари 2023 йил апрелда мамлакатда можаро бошланганидан бери эгаллаб турилган Хартум аэропортидан Тезкор ҳаракат кучларини чиқариб юборди. Бу ҳақда Al-Jazeera хабар бермоқда.
“Аэропорт можаронинг дастлабки кунларида ТҲК томонидан эгаллаб олинган биринчи объектлардан бири эди. Армия аэропорт устидан, шу жумладан, фуқаро рейсларига мўлжалланган қисми устидан ҳам тўлиқ назоратни ўрнатишга эришди”, дейди телеканал мухбири воқеа жойидан тайёрланган репортажида.
Al-Jazeera маълумотларига кўра, ҳарбийлар аэропорт атрофидаги бир нечта турар жой ҳудудларини ҳам эгаллаб олган.
Бундан олдин Судан Қуролли кучлари Хартумдаги президент саройи ва Марказий банкни ТҲКдан тортиб олишга, Кўк Нил орқали Хартум ва Шимолий Хартумни боғлайдиган Ал-Маншея кўприги устидан назоратни таъминлашга муваффақ бўлган эди.
Бу ҳудудда фақат Хартум жанубидаги Жабал-Авлиё тўғонидаги шлюз орқали ўтадиган кўприккина ТҲК қўлида қолмоқда. Маҳаллий аҳолининг айтишича, тезкор ҳаракат кучлари пойтахтдан жанубга, айнан шу йўналишда чекинмоқда.
Суданда ҳарбийлар ва Тезкор ҳаракат кучлари ўртасидаги қуролли можаро 2023 йил 15 апрелдан бери давом этмоқда. Associated Press агентлигининг хабар беришича, можаро оқибатида камида 28 минг киши ҳалок бўлган. 14 миллиондан ортиқ киши ўз уйларини тарк этишга мажбур бўлган.
Изоҳ (0)