26 август куни Мўйноқ шаҳрида қурилган янги аэропортга биринчи йўловчи рейси амалга оширилди. Бу ҳақда Қорақалпоғистон хабар агентлиги хабар берди.
Airbus А-320 самолёти янги аэропортга Тошкентдан йўловчиларни олиб келган.
Маълумот учун, Мўйноқ — Ўзбекистон шимоли-ғарбийда жойлашган шаҳар номидаги аэропорт бўлиб, 1947 йилда қурилган. 3-классга оид Мўйноқ аэродроми «Ан-24», «Як-40» ва бошқа енгил самолётларни, шунингдек, барча турдаги вертолётларни қабул қилишга қодир бўлган.
1960 йиллар бошидан 1990 йилга қадар аэродромда «Ан-2» самолётлари кунига маҳаллий линиялар бўйича (асосан, Қўнғирот, Нукус, Урганч, Тахтакўприк, Қозоқдарё, Аспантай, Тулей пунктлари) 19 тагача йўловчи авиарейсларини амалга оширган.
Эслатиб ўтамиз, 2019 йилда Қорақалпоғистоннинг Мўйноқ туманини комплекс ижтимоий-иқтисодий ривожлантириш чора-тадбирлари тўғрисидаги ҳукумат қарори қабул қилинган. Қарорга мувофиқ, Мўйноқ тумани барча зарурий инфратузилмага, жумладан, инновацион мактаб, спорт объектлари, даволаш-профилактика муассасалари, замонавий аэропорт, меҳмонхона, савдо ва кўнгилочар дам олиш марказлари, «селфи объект»лари, оптик толали интернет тармоғи, ИП-телевидениега эга бўлган замонавий шаҳарчага айлантирилади.
Изоҳ (0)