Урганч халқаро аэропортини давлат-хусусий шериклик асосида модернизация қилиш ва бошқариш бўйича тендерда Жанубий Кореянинг Incheon International Airport Corporation компанияси ғолиб бўлди. Бу ҳақда Uzbekistan Airports матбуот хизмати хабар берди.
“Урганч халқаро аэропортини модернизация қилиш ва бошқариш” лойиҳасининг “Қуриш-бошқариш-топшириш” бўйича очиқ тендери 2024 йилнинг 1 августида эълон қилинган эди. Хабарда айтилишича, танлов икки босқичда бўлиб ўтди: малака сўрови (RfQ) ва таклифлар сўрови (RfP). Тендерда саккизта компания иштирок этди, улардан бештаси иккинчи якуний босқичга ўтди, шундан сўнг идоралараро тендер комиссияси ғолибни аниқлади.
Давлат-хусусий шериклик лойиҳаси аэропортни модернизация қилиш ва бошқариш лойиҳасини биргаликда амалга оширишни назарда тутади. Хусусий шерик йўловчи ва юк терминалларини қуриш ва бошқариш, шу жумладан ерда хизмат кўрсатиш ишларини амалга оширади. Давлат шериги аэродром мажмуасини қуриш ва бошқариш (учиш-қўниш йўлаги, перрон) учун жавобгарликни ўзига олади. Лойиҳага кўра кейинги қадам 19 йиллик консессия муддатини ўз ичига олган ДХШ шартномасини тузиш бўлади.
“Танлов ғолиби бўлган Инчеон халқаро аэропорти нафақат Корея Республикасининг асосий ҳаво дарвозаси, балки Шимолий-Шарқий Осиёдаги энг йирик транспорт марказларидан бири бўлиб, у бир неча маротаба дунёнинг энг ривожланган ва гавжум аэропортлари 10 талигига кирган. 2024 йил якунлари бўйича аэропорт 70 миллион йўловчига хизмат кўрсатган.
Урганчдаги лойиҳани амалга оширадиган жамоа Хоразм аэропортини йўловчилар учун энг замонавий ва қулай аэропортлардан бирига айлантириб, минтақанинг хорижлик сайёҳлар учун жозибадорлигини оширишига ва, умуман, Ўзбекистон авиация соҳасини ривожлантиришга ҳисса қўшишига ишонамиз” дея изоҳ берди Uzbekistan Airports компанияси.
Урганч халқаро аэропортини модернизация қилиш ва бошқариш бўйича давлат-хусусий шериклик лойиҳаси президентнинг 2024 йил 30 августдаги қарори ижроси доирасида Uzbekistan Airports АЖ томонидан Транспорт ҳамда Иқтисодиёт ва молия вазирликлари билан ҳамкорликда амалга оширилмоқда.
Изоҳ (0)