Хитой раиси Си Цзиньпин Украина президенти Владимир Зеленский билан уруш бошланганидан бери илк виртуал учрашувни ўтказишни режалаштирмоқда. Бу ҳақда манбаларга таяниб, The Wall Street Journal хабар берди.
Суҳбат виртуал бўлиб ўтиши кутилмоқда ва у Си Цзиньпин Россия президенти билан учрашганидан кейин ташкиллаштирилиши мумкин.
“Путин ва Зеленский билан суҳбат Хитойнинг Украинадаги урушни тугатишда воситачилик қилишда фаолроқ рол ўйнаш истагини акс эттириши мумкин”, — дея таъкидлайди WSJ манбалари.
Зеленский билан онлайн музокара олиб бориш амалга ошса, бу Хитойнинг тинчликпарвар ролни ўйнашга қаратилган ҳаракатларида муҳим қадам бўлади. Сабаби Европа бунга шубҳа билан қараб келган.
WSJ’нинг қўшимча қилишича, бу ўтган ҳафта Пекинда Эрон ва Саудия Арабистони 7 йил ўтиб дипломатик алоқаларни тиклаш бўйича музокара ўтказганидан сўнг Хитойнинг глобал куч маркази сифатидаги обрўсини оширади.
Аввалроқ Зеленский Хитой раиси билан учрашса, бу учрашув икки мамлакат ва дунёдаги хавфсизликка фойда келтиришини айтганди. Хитой раҳбари Си Цзиньпин эса келаси ҳафтада ҳамкасби Владимир Путин билан учрашиш учун Россияга боришни режалаштираётгани маълум қилинган.
Изоҳ (0)