“Дарё” нашри 23 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Украина ва Россиянинг шиддатли жанглари артиллерия ўқлари ва снарядлар пойгасига айланмоқда
Қор ва лой шароитида ҳам шиддатли бораётган жанглар Украина армиясини кунига 4 000 тадан 7 000 тагача артиллерия ўқларини сарфлашга, Россияни эса бундан ҳам кўпроқ снарядлардан фойдаланишга мажбур қиляпти.
“Уруш шу қадар шиддатли кечмоқдаки, Украина кунига 4 000 дан 7 000 тагача, Россия Федерацияси эса 20 000 тагача артиллерия снарядларини ишлатмоқда. Ҳозир ўқ-дори истеъмоли даражаси ишлаб чиқариш даражасидан юқори”, — дейди НАТО бош котиби Енс Столтенберг.
Ҳозирга келиб Украина учун ўқ-дорилар масаласи долзарблигича қолмоқда, чунки Путин урушни тугатиш ниятида эмас. “Ғарб Украинани ўқ-дори ва қуроллар билан давомли қўллаб-қувватлашга тайёрланиши керак”, — деган НАТО бош котиби.
Унинг сўзларига кўра, Россия ҳарбий-саноат ишлаб чиқаришни кўпайтирмоқда, шунингдек, қурол-яроғ учун Эрон, Шимолий Корея ва бошқа давлатларга мурожаат қиляпти.
Бўлажак президентлик сайловлари ва “Сибир қудрати-2” газ қувури, АҚШ расмийлари нимадан хавотирда?
Айни вазиятда Россия ва Хитойнинг яқинлашишига имкон берилиши Жо Байден маъмуриятининг стратегик хатоси дея талқин қилмоқда АҚШнинг собиқ давлат котиби
Эслатиб ўтамиз, Си Цзиньпин 20 март куни расмий ташриф билан Москвага келди. Сиёсатчи Россия бош вазири Михаил Мишустин билан музокаралар олиб борди ва давлат раҳбари Владимир Путин билан икки марта учрашди.
Сиёсатчилар Украинадаги можарони тартибга солишни, 2024 йилда Россияда бўлиб ўтадиган президентлик сайловларини муҳокама қилиб, “Сибир қудрати-2” газ қувурини қуриш бўйича келишувнинг асосий параметрларини келишиб олди.
Музокаралар якунида эса Путин ва Си Цзиньпин 2030 йилгача иқтисодий ҳамкорликни ривожлантириш режасини имзолади.
Биргалик ва айри позициялар
Россияга яқинлашиш позицияси давлатларда турли хил муҳокамаларга сабаб бўляпти. Айни вазиятда Беларусь мухолифатчиси, президентликка собиқ номзод Светлана Тихановская Беларусни Россия билан алоқаларни узишга чақирди.
“Украинага ҳужум қилиш ва унга таҳдид солиш” учун Беларусь ҳудуди, ҳаво ҳудуди ва инфратузилмасидан ҳарбий мақсадларда “эркин фойдаланади”, деди Тихановская.
Унинг айтишича, Россия ноқонуний режимни қўллаб-қувватлаб, Беларусь миллий ўзлигига қарши мустамлакачилик ҳаракатларини амалга оширмоқда.
Ўзбекистонда эҳтиёжманд оилаларга ижара ерлар, тадбиркорларга эса банк устамасисиз кредитлар нима учун берилмоқда?
Президент сўзларига кўра, озиқ-овқат етиштиришни кўпайтириш учун 2023 йилда 6,2 триллион сўм ажратилади. Бу маблағ тадбиркорлар ва эҳтиёжманд оилаларга турли имкониятлар кўринишида тақдим этиляпти.
Масалан,1 апрелдан 130 миллион доллар маблағ банклар иштирокисиз, тўғридан тўғри тадбиркорларга ажратилади. Бунда банк устамаси бўлмайди ва тадбиркор бозорга қараганда анча арзон кредит олиш имконига эга бўлади. Ушбу маблағлар маҳсулот етиштириш, қайта ишлаш ва харид қилиш, техника сотиб олиш учун 10 йилгача 14 фоиздан ажратилади.
Бундан ташқари, эҳтиёжманд аҳолига дала атрофидаги ерлар 10 йилга иккиламчи ижарага берилади. Айни пайтда дала четларига узум кўчатлари ва қовоқ уруғларини, тут кўчатларини экиш, парранда ва асалари уяларини етказиб бериш бўйича масъулларга топшириқлар берилди.
Изоҳ (0)