Россия армияси 4 апрель куни Украинанинг Кривой Рог шаҳридаги турар жой кварталига ракета ҳужуми уюштирди. Ҳужум оқибатида ҳалок бўлганлар сони 20 кишига етди. Уларнинг тўққиз нафари болалардир. Бу ҳақда Deutsche Welle хабар берди.
Маълумотларга кўра, бу Украинадаги кенг кўламли уруш давридаги энг йирик болалар ўлими ҳисобланади. БМТнинг инсон ҳуқуқлари бўйича олий комиссари Фолкер Тюрк ҳужумга шундай муносабат билдирди. У 5 апрель куни Инсон ҳуқуқлари бўйича комиссия зарба жойига бориб, етказилган зарарни ҳужжатлаштиргани ва ўлдирилган 9 нафар боланинг исмини аниқлаганини айтди. Ҳозирда ташкилот мутахассислари маълумот йиғишда давом этмоқда.
Бу 2022 йил февралида бошланган кенг кўламли босқин давридан бери болаларга қарши амалга оширилган энг ҳалокатли ҳужум ҳисобланади. Бу ақл бовар қилмайдиган даҳшат — тўққиз бола ҳалок бўлди, уларнинг аксарияти боғда ўйнаётганда уларнинг тепасида ҳарбий қурол парчалари портлади. Кривой Рогда оилалар болалар майдончаси, ресторан ва турар жой бинолари олдида тўпланганида портлаш 18 кишининг ҳаётига зомин бўлди, дейилади ташкилот баёнотида.
БМТ олий комиссари таъкидлашича, Россия томонидан аҳоли зич жойлашган ҳудудда портловчи қуролларнинг қўлланиши тинч аҳоли ҳаётига бепарволик билан муносабатда бўлишни кўрсатади.
Россия расмийлари ҳужум нишони украиналик ҳарбийлар гуруҳи бўлганини даъво қилмоқда. Бироқ воқеа жойидаги маҳаллий аҳолининг БМТ комиссиясига айтишича, ҳужумдан бир оз олдин ресторанда косметологлар форуми бўлиб ўтган — бу ҳақда интернетда ҳам хабарлар бўлган ва у ерда ҳеч қандай ҳарбийлар бўлмаган.
Ҳатто Россия расмийлари ҳарбийлар бўлиши мумкинлиги ҳақида маълумотга эга бўлган тақдирда ҳам, ҳужумнинг усули ва шароити уни нишонни танламасдан амалга оширилган ҳужум сифатида баҳолашга асос бўлади, дейилади БМТнинг Инсон ҳуқуқлари бўйича олий комиссари бошқармаси баёнотида.
Баёнотда, шунингдек, бундай ҳужумлар халқаро гуманитар ҳуқуқ билан тақиқлангани ва ҳарбий жиноят ҳисобланиши эслатиб ўтилган.
Изоҳ (0)