“Дарё” нашри 13 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Нега Бахмутдаги урушда Россия армияси ўрнига Вагнер ҳужумчилари жанг қилмоқда ?
Бахмутдаги уруш давом этмоқда. Айни пайтда Россия томонида жанг қилаётган Вагнер ҳужум отрядлари Украина қўшинлари мудофаасини ёриб ўтиб шаҳар марказига киришга уриняпти.
Украинанинг қуруқлик қўшинлари қўмондони айтишича, ҳозирда
артиллерия, танк ва бошқа қуроллар ёрдамида шаҳар эгалланишига тўсқинлик қилинмоқда.
Бахмут жанглари ёритилаётган хабарларда, сўнгги пайтлар Вагнер таркибидаги йўқотишларга эътибор қаратилди. Пригожин бу йўқотишларга қандай мақсадни кўзлаб рози бўлганди?
Урушни тадқиқ қилиш институти таҳлилларига кўра, Путин ўз режимини ҳимоя қилиш учун “Вагнер”дан фойдаланди. Пригожин эса Бахмутни ўз мақсадларига эришишда Кремл устидан таъсир ўтказиш имконияти сифатида кўрган.
Уруш қандай якунланиши керак? Украина ва АҚШ муносабатлари кескинлашяпти
Politico хабарига кўра, ҳозирга келиб Украина ва АҚШ ўртасида парда ортидаги келишмовчиликлар кучайган. Бу икки мамлакат муносабатларидаги асосий "инқироз нуқтаси" уруш қандай якунланиши кераклиги ҳақидаги қарашлардир.
Мазкур вазиятда Вашингтон Россия Қримни йўқотиш билан келишиб олишига шубҳа қиляпти. Аммо шунга қарамай АҚШ уруш ва тинчлик бўйича қарорларни Зеленский ихтиёрига қолдиради.
Хитой раҳбари Си Цзиньпин Россия ва Украина президентлари билан учрашади
Хитой етакчиси Си Цзиньпин келаси ҳафта Владимир Путин билан учрашиш учун Россияга боради. Reuters маълумотларига кўра учрашув режалаштирилган вақтдан кўра эртароқ амалга оширилмоқда.
Аввалроқ Россия ОАВ Путин Си Цзиньпинни баҳорда мамлакатга келишга таклиф қилганини ёзган. Ғарб манбалари эса бу ташриф апрель май ойларида бўлишини айтган эди.
WSJ маълумотларига кўра, Хитой раиси Путин билан учрашувдан кейин, Украина президенти Владимир Зеленский билан виртуал учрашув ўтказади.
“Путин ва Зеленский билан суҳбат Хитойнинг Украинадаги урушни тугатиш воситачилигида фаолроқ рол ўйнаш истагини акс эттириши мумкин”, — дея таъкидламоқда нашр манбалари.
Пекинда ўтказилган Эрон ва Саудия Арабистони музокараларидан сўнг, Хитойнинг навбатдаги ҳаракатлари глобал куч маркази сифатидаги обрўсини янада оширади.
Жанубий Корея ядро қуроли ишлаб чиқариши мумкин, бунинг сабаблари нимада?
Шимолий Корея бу сафар сувости кемасидан “стратегик қанотли ракеталар” учирди ва кейинроқ улар Япон денгизидаги нишонга тегганини маълум қилди.
Шундан сўнг Сеул мэри О Се Хун Жанубий Корея ўз ядро қуролини ишлаб чиқиши кераклиги ҳақидаги чақириқ билан чиқди. "Биз шундай нуқтага келдикки, энди одамларни ядро қуролини яратишдан тийилиш ва ядросизланиш ғоясига содиқ қолишимиз кераклигига мантиқан ишонтириш қийин”.
Шу билан бирга сиёсатчи "Украинада уруш бошланганидан кейин Корея яриморолининг ядросизланиши “ўз жозибадорлигини йўқотган”ини таъкидлади.
Сеул мэри аслида ким ва унинг бундай чақириқ билан чиқишига фақатгина юқоридаги ҳолатлар сабабми?
Сеул мэри — республика президенти Юн Сук Ёлнинг консерватив “Халқ ҳокимияти партияси”нинг нуфузли аъзоси ҳисобланади ва у 2027 йилги президентлик сайловида давлат раҳбари лавозимига даъвогарлик қилиши мумкин.
Лекин Шимолий Корея армиясидаги ютуқлар фонида Жанубий Кореянинг юқори мартабали амалдорлари ҳам айни пайтда ядро қуролини ишлаб чиқиш ёки АҚШнинг 1990 йилда Кореядан олиб кетган Америка тактик ядро бомбалари ва ракеталарини қайта жойлаштириш масаласини кўтармоқда.
Изоҳ (0)