Хитой ҳукумати мамлакатда Америка фильмларини намойиш қилишни тақиқлаши мумкин. Бунга АҚШ томонидан жорий этилган импорт божлари сабаб бўлмоқда.
Хитойлик икки машҳур блогер эҳтимолий жавоб санкциялари рўйхати билан бўлишди, улардан бири партия собиқ раҳбарининг ўғли ҳисобланади. Рўйхатга кўра, АҚШ фильмларининг импорт қилиниши қисман ёки тўлиқ тўхтатилиши мумкин. Бу чоралар ҳақиқатан ҳам жорий этиладими, йўқми — ҳозирча номаълум.
Хитой кинематография маҳсулотлари бўйича АҚШдан кейин дунёда иккинчи ўринда туради. 2025 йилда мамлакат экранларида “Уддалаб бўлмас топшириқ: якуний жазо”, “Supermen” каби йирик Голливуд фильмларининг намойиши кутилмоқда. Ҳозирда эса Хитой кинотеатрларида “Майнкрафт: кино” фильми намойиш этилмоқда. Мазкур фильм ўтган ҳафта рейтинглари бўйича энг кассабоп лойиҳа сифатида биринчи ўринни эгаллаб турибди.
АҚШ президенти Дональд Трамп Хитойдан импорт қилинадиган маҳсулотларга 50 фоизлик қўшимча бож жорий қилиш билан таҳдид қилган эди. Хитой Савдо вазирлиги маълумотларига кўра, мамлакат АҚШ шартларини шунчаки қабул қилмайди. Бу тақиқдан биринчи навбатда Голливуд фильмларини томоша қилувчи оддий Хитой фуқаролари жабр кўради. Қолаверса, бундай сиёсат Америка киносининг Хитойда даромад топишига тўсқинлик қилади ва уларнинг умумий касса йиғимларига жиддий зарар етказади.
Изоҳ (0)