Катта сериалларда ҳам кичик кўнгилсизликлар бўлиб туради. «Муҳташам юз йил» сериалида йўл қўйилган камчиликлар (фото)

«Муҳташам юз йил» сериали бутун турк телевидениеси тарихидаги энг қиммат лойиҳа бўлган. Ундаги актёрлар маҳорати, либослар, декорациялар бутун дунё томошабинларининг турк киносаноатига бўлган қизиқишини янада ошишига сабабчи бўлган. Аммо суратга олиш жараёнида айрим камчиликларга йўл қўйилган ва бу томошабинлар эътиборидан четда қолмаган. Бунга қуйидаги фотолар исбот бўла олади.

Татуировка

Эпизодлардан бирида Хуррам султоннинг ясанишига ёрдам бераётган Мария — ёрдамчи қиз қўлида татуировкани кўриш мумкин. Актриса қўлидаги тату гримёрларнинг ёдидан кўтарилгани сабаб кадрга тушиб қолган.

Бир либос ва тақинчоқдан бир неча актриса фойдаланган

Сериал учун тақинчоқлар энг яхши турк заргарлари томонидан ясалган, либослар эса энг сифатли мато ва Swarovski тошлари билан безатилган. Аммо томошабинлар назаридан бир либос ёки тақинчоқнинг бошқа қаҳрамон томонидан ҳам фойдаланилгани четда қолмаган. Масалан, Хуррам султон кийган либосларни Сулаймоннинг синглиси Фотима султонда ҳам кўриш мумкин. Шунингдек, кимдир бўйнига таққан тақинчоқ кейинги қисмларда тиллақош сифатида ёки аксинча ишлатилган.

Турли овозлар

Сериалнинг 4, 12, 17 ва 22 қисмларида орқа фондан самолётнинг учаётган овози эшитилади.

Трактор

Сериал суратга олиш майдончасида ҳарбий сафарлар атмосферасини берадиган барча нарса ва жиҳозлар мавжуд бўлган. Аммо кадрга тушиб қолган трактор сериал ичига кириб, муҳитни ҳис қилган одам фикр-хаёлини чалкаштириб юборади.

Нарвон

Бали бей ва Меҳримоҳ учрашадиган эпизодда ўнг тарафда нарвон турганини пайқаш мумкин. Майда деталларгача эътибордан қочирмаган суратга олиш жамоаси яққол кўриниб турган нарвонни қандай қилиб кўздан қочиргани кишини ажаблантиради.

Уяли алоқа миноралари

Ҳарбий сафарлар саҳнаси шаҳардан ташқарида бино ва қурилишлар кўзга ташланмайдиган ерда суратга олинган. Аммо вазир Иброҳим бор кадрда уяли алоқа миноралари ҳам кўриниб қолган.

«Виключатель»

Хадича султон акс этган саҳнада шам, унинг орқасида эса «виключатель» кўриниб қолган. Бу кадрдан ҳамма чироқ ўчганда шам ёқса, фильм ижодкорлари шам ўчганда чироқдан фойдаланган деган хулосага келиш мумкин.

Столни ясатиш

Сериалда овқатланиш саҳналари ҳам бир қанча танқидларга сабаб бўлган. Столда биронта сочиқ бўлмаган. Стол, стул, декорацион шамдон, шунингдек, деворга осиб қўйиладиган суратли гиламлар европаликларга хос бўлган, Усмонлиларга эмас. Шунингдек помидор, олма каби маҳсулотлар ҳам империяга анча кейин келтирилган.

Тўқима қаҳрамонлар

Сериалда Хуррамнинг етарлича асабига ўйнаган рақибларидан бири Изабелла Фортуна бўлган. Сериалда Изабелла ёш ва гўзал венециялик малика сифатида тасвирланган. Тарихда ростан ҳам шундай малика бўлган, аммо малика вафот этган вақтда Сулаймон 10 ёшда бўлган.