Америкалик телебошловчи Жимми Киммелнинг дастури давомида таниқли Голливуд актёри Крис Ҳемсворт уйида суратга олиш майдончасидан ўғирланган Торнинг болғасини мақтанишни жуда яхши кўришини маълум қилди, деб хабар беради «Кинопоиск».
Актёрнинг таъкидлашича, унинг бу қилиғи хотинига — актриса Эльза Патакига ёқмайди ва у болғани доим жавонга солиб қўяди.
«Унинг турли жойларга сакраб юрадиган одати бор. Мен уни камин олдидаги токчага қолдирсам, хотиним уни яна жавонга солиб қўяди. Уни ошхонага қўйсам, у яна жавонга қайтиб боради», — дейди Ҳемсворт «Тор» фильмидаги «Мьёльнир» болғасини намойиш этар экан.
Маълумотларга кўра, Ҳемсвортнинг уйида жами бешта Тор болғаси бор бўлиб, актёр уларни суратга олиш майдончаларидан олиб келган. Бошқа актёрлар ҳам суратга олиш жойидан турли сувенирларни ўзиники қилиб олишни яхши кўради:
- «Тор: Рагнарёк» фильмида Ҳемсворт билан суратга тушган Кейт Бланшеттда ҳам ўзининг «Мьёльнир»и бор. Шунингдек, актрисанинг уйида «Хоббит» трилогиясидаги Тауриэль тиғлари, эльфларнинг қулоқлари ва хоббитларнинг оёқлари ҳам сақланади;
- Том Холланд эса «Ўргимчак одам» фильмида тўрларни отишга мўлжалланган мослама ва «Уйдан узоқда» фильмидаги Тони Старкнинг кўзойнагини ўзиники қилиб олган;
- Крис Пратт эса Юлдуз Лордининг курткаси ва костюмидаги бир қанча элементларни олиб кетган. Унинг сўзларига кўра, актёр бу ишни ўз қаҳрамони қиёфасида шифохоналардаги болаларнинг олдига бориш учун қилган;
- Чедвик Боузманнинг уйида «Қора пантера» фильмидаги Кимойонинг тақинчоғи сақланади;
- Себастиан Стэн ва Карен Гиллан суратга олиш жойидан реквизитларни олиб кетиш ўрнига, сохта металл қўлни кийишга ёрдам берадиган гель захирасини олиб қўйган.
Изоҳ (0)