Венгрия саккиз нафар россияликни Европа иттифоқининг санкциялар рўйхатидан чиқаришни талаб қилди. Акс ҳолда санкцияларнинг узайтирилишини блоклаш билан таҳдид қилмоқда. Бу ҳақда Reuters хабар берди.
Бу шахсларнинг кимлиги расман эълон қилинмаган. “Система” тадқиқот лойиҳаси эса манбаларга таяниб, уларнинг исмини аниқлаштирди.
Рўйхатга россиялик олигарх Алишер Усмонов, унинг синглиси Гулбаҳор Исмоилова, “Алфа-Банк” ҳаммуассислари Михаил Фридман ва Пётр Авен, “Уралхим” холдинги ҳаммуассиси Дмитрий Мазепин, Европа яҳудийлари конгрессига раҳбарлик қилган тадбиркор Вячеслав Моше Кантор, шунингдек, “Альянс” гуруҳи раҳбари ва нефть магнати Муса Бажаев киритилган.
Рўйхатда спорт вазири ва Хабаровск ўлкасининг собиқ губернатори Михаил Дегтярев ҳам жой олган. Венгрия нима учун айнан шу шахсларни “қора рўйхат”дан чиқаришни сўраётгани номаълум.
Европа иттифоқининг санкциялар рўйхати мунтазам равишда 27 аъзо давлатнинг бир овоздан қўллаб-қувватлаши билан қайта кўриб чиқилади ва узайтирилади. Венгрия аввал ҳам вето ҳуқуқидан фойдаланиш билан таҳдид қилган эди.
Венгрия бош вазири Виктор Орбан санкциялар Россиядан кўра Европа иттифоқи мамлакатларига кўпроқ таъсир ўтказаётганини айтган. Брюссел эса санкциялар бўйича ягона чизиқ бўлмаса, Европа Иттифоқи Москвага босим ўтказишнинг асосий воситасини йўқотишини таъкидлаган.
Изоҳ (0)