Ҳиндистон Канададан 10-октябргача 40 дан ортиқ дипломатини чақириб олишни талаб қилди, деб хабар бермоқда Financial Times нашрига масаладан хабардор манбалар. Улардан бирининг айтишича, Нью-Деҳли ушбу санадан кейин қолганлар учун дипломатик иммунитетни бекор қилиш билан таҳдид қилмоқда. Канада Ташқи ишлар вазирлиги ва Ҳиндистон ҳукумати изоҳ беришдан бош тортди.
Газетанинг ёзишича, Канада расмийлари Оттавада сикх сепаратистлари етакчиларидан бири Ҳардип Сингх Нижарнинг ўлдирилишига алоқадор деб ҳисобланган ҳинд разведкасининг юқори мартабали зобитини мамлакатдан чиқариб юборишга қарор қилганидан кейин икки давлат ўртасида инқироз юзага келган.
FT манбасининг айтишича, Ҳиндистонда 62 нафар канадалик дипломат бор, Нью-Деҳли улардан 41 нафарини қисқартиришини маълум қилган.
FT суҳбатдошлари, шунингдек, Нижарнинг ўлдирилиши Канада бош вазири Жастин Трюдо ва Ҳиндистон бош вазири Нарендра Моди ўртасида G20 саммитидаги музокараларнинг асосий мавзуларидан бири бўлганини айтишди. Ўшанда Ҳиндистон томони Оттаванинг воқеани тергов қилишда ҳамкорлик қилиш ҳақидаги сўровини “қатъий рад этган”, деди манбалар.
Канада Ҳиндистонни сиёсий қотилликда гумон қилди
Ҳардип Сингх Нижар Ҳиндистонда мустақил сикх давлати — Халистонни ташкил этиш тарафдори эди. Ҳиндистон ҳукумати уни террорчи деб ҳисоблаган. Нижар 18 июнь куни Канаданинг Ванкувер ҳудуди яқинида жойлашган Сарри шаҳридаги сикхлар ибодатхонаси ёнида ўлдириб кетилган.
Трюдо 18-сентябр куни парламентга фавқулодда мурожаат қилди ва унда Канада ҳуқуқ-тартибот идоралари Ҳиндистон ҳукумати агентлари ва Нижарнинг ўлими ўртасидаги потенциал боғлиқликка оид “ишончли даъволарни” қидираётганини айтди.
Ҳиндистон ТИВнинг жавоби
Ҳиндистон Ташқи ишлар вазирлиги мамлакатнинг Нижар ўлимига алоқадорлиги ҳақидаги тахминларни “абсурд” деб атади. ТИВ томонидан эълон қилинган баёнотда, бош вазир Моди Трюдо билан суҳбатда бу айбловларни “бутунлай рад этгани” таъкидланган.
Ҳардип Сингх Нижар Ҳиндистонда туғилган, аммо сўнгги йилларда Канадада яшаган ва шу мамлакат фуқаролигини олган. 2018 йилда Ҳиндистон расмийлари Нижарни сикх сепаратистлари томонидан содир этилган кўплаб қотилликларга алоқадорликда айблади. У ўз айбини қатъиян рад этди.
Ҳиндистон Канадага юборган “террорчилар рўйхати”да Нижарнинг ҳам исми киритилган.