Канадада собиқ Марказий банк раҳбари Марк Карни Либерал партиянинг янги раҳбари лавозимига ўтказилган сайловда ғалаба қозонди.
У 9 март куни ўтказилган сайловнинг дастлабки ҳисоб-китоби натижаларига кўра 85 фоиздан ортиқ овоз тўплаб, собиқ молия вазири Христя Фриланд, Либерал партия аъзоси Карина Гулд ва бизнесмен Фрэнк Бэйлисни ортда қолдирди.
Марк Карни 2025 йил январида истеъфога чиқишини эълон қилган Жастин Трюдо ўрнига бош вазир бўлади. Жастин Трюдо сиёсий ҳаракат унга ўринбосар топиши биланоқ вазифасини тарк этишини айтганди.
Жастин Трюдо 2013 йилдан бери партияга раҳбарлик қилиб келган, 2015 йилда эса бош вазир лавозимини эгаллаганди.
Марк Карни Дональд Трамп томонидан импортга 25 фоизлик божхона тўловлари киритилиши ва АҚШ президентининг Канада суверенитетига дахл қилиши шароитида АҚШ билан савдода қарамликни камайтириш мақсадида Европа ва Осиё билан яқин ҳамкорлик тарафдори.
Бундан ташқари, у ўрта синф учун солиқларни камайтириш, бюрократияни қисқартириш ва инновациялар ва инвестицияларни фаол рағбатлантиришни ўз ичига олган фундаментал иқтисодий ислоҳотларни амалга оширишни ваъда қилмоқда.
Изоҳ (0)